Петмина убиени во украински напад во регионот Луганск

Пет општински работници се убиени во украински напад во регионот Луганск, кој е под руска контрола, соопштија локалните власти.

Гувернерот на регионот назначен од Москва, Леонид Пашечник, напиша на Телеграм дека четворица работници се обидувале да го одржуваат системот за водоснабдување во градот Сватово кога биле убиени во воздушните напади.

Раководителот на регионалната здравствена служба, подоцна изјави дека еден повреден работник починал од повредите во болница.

Регионот Луганск е еден од четирите украински региони што Русија ги анектираше во 2022 година, заедно со регионите Донецк, Херсон и Запорожје – седум месеци по почетокот на целосната војна во Украина.

Во јуни, Москва соопшти дека обезбедила контрола врз територијата на целиот регион Луганск. Русија контролира и делови од другите три региони.