Пендаровски: Глас за број три значи гаранција дека нема да се врати режимот на Груевски

Кандидатот за претседател на СДСМ и коалицијата Стево Пендаровски вечерва во Велес истакна дека граѓаните треба да гласаат за број три, бидејќи тоа е гаранција дека режимот на Груевски нема да се врати, оти ќе се поддржи политичката опција што ја внесува Северна Македонија во Европската Унија и НАТО, оти на тој начин земјата ќе добие претседател од кој нема да се срами.

– Има точно три години како почна „шарената револуција“, километри поминавме изиритирани од тогашната одлука на Иванов да аместира педесетина „супер криминалци“ од тогашниот режим на фамилијата. Чув дека постои иницијатива од некогашните „шарени револуционери“, кои доведоа до пад на режимот, заедно со сите нас, двајцата против кандидати од вториот круг да се соочиме со тие луѓе за тие да ни кажат кои се нивните замерки за изминатите три години, зошто дел од нив се разочарани, што можеме да направиме за да се обврземе пред нив, оваа држава конечно да биде уредена според клучниот принцип на шарената револуција – „нема правда, нема мир“. Ја прифаќам таа покана во време и место кое тие ќе го определат и подготвен сум да одговорам на сите нивни барања, нагласи Пендаровски.

Наведе дека, доколку другата опција добие мнозинство на вториот круг од претседателските избори, тоа ќе значи враќање на Груевски, и како што рече негово управување од Скопје.

– До оние кои останаа дома, јас ги разбирам вашите загрижености, ако ме прашувате и мене и јас не сум 100 посто задоволен од тоа што го направиме во социо-економската сфера, но верувајте не можеше повеќе да се постигне со оглед на тоа што го затекнавме претходно, руина од држава, сите институции партизирани и на колена, порача Пендаровски.

Тој ги повика сите гласачи да излезат и да го искористат нивното право на глас.

Лидерот на СДСМ Зоран Заев рече дека Пендаровски е симболот на правдата и правичноста и порача дека правото и законите денеска важат еднакво за сите, дека пресуди ќе се носат за сите за кои има докази, а не како претходно по нарачка.

– Ќе фаќа метлата и на другата страна, на оние што опструираа. Ние сме добри, сите сме еднакви. Слушам пак списоци во Велес правеле. Ние не сме глупави, знаеме. Ќе има метла и на другата страна. Во мојот кабинет работам со луѓе што ги затекнав. Со сите што засукаа ракави работевме. Ама нема да дозволиме некој да да враќа режим, рече Заев.