Оживеана легендата за потонатите градови: Во Франција пронајден подводен ѕид  стар 7.000 години 

Француски морски археолози открија масивен подводен ѕид покрај брегот на Бретања, кој датира од околу 5.000 година п.н.е.

Тие веруваат дека ѕидот би можел да биде од општество од камено доба чие исчезнување под покаченото море е потеклото на локалниот мит за потонат град, објавува Би-Би-Си.

Кога бил изграден на островот Сена на западниот врв на Бретања, ѕидот би бил на брегот – помеѓу ознаките за висока и ниска плима. Денес е под девет метри вода, бидејќи островот се намалил на дел од неговата поранешна големина.

Ѕидот е просечно широк 20 метри и висок два метра. Во редовни интервали, нуркачите пронашле големи гранитни камења, или монолити, кои штрчат од ѕидот во две паралелни линии.

Се верува дека тие првично биле поставени на карпеста подлога, а потоа околу нив бил изграден ѕид од плочи и помали камења. Ако хипотезата за стапица за риби е точна, тогаш линиите на испакнати монолити би поткрепиле и мрежа направена од стапчиња и гранки за фаќање риби додека плимата се повлекува.

Со вкупна маса од 3.300 тони, ѕидот мора да бил дело на значајна населена заедница. И за да трае 7.000 години, очигледно бил исклучително цврста градба.

„Изграден е од високо структурирано општество на ловци и собирачи, вид кој станал седентарен кога ресурсите дозволувале. Или бил изграден од едно од неолитските популации кои пристигнале тука околу 5.000 година п.н.е.“, рече археологот Иван Пајлер.

Ѕидот е откриен откако локалниот геолог Ив Фуке ги проучувал мапите на подводните длабочини направени со најновата радарска технологија.

Во труд објавен во Меѓународниот журнал за наутичка археологија, авторите претпоставуваат дека ваквите места може да бидат извор на локалните бретонски легенди за потонатите градови.