Ова се најкористените апликации за е-трговија во светот
Мобилните апликации станаа главен влез во светот на онлајн купувањето за стотици милиони потрошувачи ширум светот. Од секојдневните потреби до брзата мода и електрониката, апликациите за е-трговија денес го обликуваат начинот на кој луѓето пребаруваат, споредуваат и купуваат производи преку границите.
Извор: Visualcapitalist.com
Оваа визуелизација ги рангира најпопуларните апликации за е-трговија во светот во 2025 година врз основа на просечниот број на месечно активни корисници (MAU). Податоците што се користат во визуелизацијата се преземени од платформата Similarweb.
Заедно, 10-те водечки апликации достигнуваат повеќе од две милијарди корисници секој месец.
Глобална доминација на Амазон
Амазон убедливо го зазема првото место, со просек од 651,7 милиони месечно активни корисници. Неговата доминација одразува широк спектар на производи, силна логистичка инфраструктура и препознатлив бренд низ цела Северна Америка, Европа и делови од Азија.
Интересно е што Амазон е една од само трите компании во првите десет што не се со седиште во Азија.
Азиски гиганти за е-трговија
Азиските платформи сочинуваат дури седум од 10-те најпопуларни апликации, предводени од „Шопи“ (Shopee – 392,8 милиони MAU), „Тему“ (246,4 милиони) и „Шеин“ (Shein – 215,1 милиони). Овие компании доживуваат брз раст благодарение на дизајнот прилагоден за мобилни уреди, агресивните цени и високиот степен на локализација на понудата.
Индија и Југоисточна Азија се исто така силно застапени. „Флипкарт“ (Flipkart – 190,8 милиони) и Meesho (159 милиони) го одразуваат брзиот раст на дигиталната потрошувачка база на Индија, додека сингапурската „Лазада“ (Lazada 109,2 милиони) продолжува да им служи на повеќе пазари во Југоисточна Азија преку уникатен екосистем на апликации.
Најпопуларните апликации за е-трговија во 2025 година
Регионални лидери надвор од Азија
Покрај „Амазон“, уште две неазиски платформи се во првите 10. „Меркадо либре“ (Mercado Libre) е на осмото место со 125,3 милиони месечно активни корисници, што ја одразува неговата доминантна позиција во Латинска Америка. „Волмарт“ (Walmart) ја затвора листата со 93,9 милиони MAU, потпирајќи се на силно малопродажно присуство во Соединетите Американски Држави.