Објавена голема прогноза за зимата
Ппрогнозата за зимата 2024/2025 година, укажува на влијание на слаба фаза на Ла Ниња и поблаг поларен вител.
Ла Ниња и Ел Нињо укажуваат на температурни флуктуации на горните слоеви на водата во централниот и источниот дел на Тихиот Океан. Ел Нињо е поврзан со нарушување на шемите на ветерот, што значи потопли температури на површината на океаните во источниот и централниот дел на Тихиот Океан, а Ла Ниња носи пониски температури во Тихиот Океан околу екваторот и е поврзана со поплави и суши.
Со доаѓањето на Ла Ниња, можеме да анализираме како таа влијаела на временските шеми во минатото бидејќи била активна неколку зимски сезони. Треба да се напомене дека Ла Ниња потекнува од Тихиот Океан, така што нема да влијае на временските шеми во Европа како што тоа го прави во САД или Канада. Сепак, тоа може да значи посув тренд на запад и повеќе врнежи во централниот и источниот дел на Европа.
Прогноза на европскиот модел
Severe Weather користеше сезонски модели за рана зимска прогноза: ECMWF од Европа и CanSIPS од Канада. Моделите ги прикажуваат просечните временски услови во текот на зимските месеци, односно општата временска прогноза што преовладува за метеоролошката зима. Така тие покажуваат како би можеле да изгледаат временските обрасци 40-60% од времето во текот на зимата.
Моделот ECMWF се смета за еден од најсигурните модели за долгорочни прогнози. За зимата, предвидува област со висок притисок што се протега од јужниот дел на Соединетите држави преку Атлантикот до западна и централна Европа.
Што се однесува до температурната слика за Европа, поголемиот дел од континентот ќе биде потопол од нормалното, поради влијанието на системот за висок притисок. Прогнозата за врнежи укажува на посушен период во западна Европа, додека остатокот од континентот очекува повеќе врнежи од вообичаено.
ECMWF предвидува потпросечно количество снег за почетокот и средината на зимата во Европа, односно до февруари. Повеќе од нормално, врнежи од снег, се предвидуваат над Скандинавија, поради влијанието на локалниот систем со низок притисок.
CanSIPS прогноза
Канадскиот модел CanSIPS ја покажува очекуваната слаба шема на Ла Ниња и областа со висок притисок над северозападна Европа. Сепак, ова се првите прогнози, па сѐ уште не покажува дефинирани области на низок притисок, како што се очекуваше.
Гледајќи ги површинските температури над Европа, моделот укажува на топли аномалии во поголемиот дел од континентот и помалку врнежи во поголемиот дел од Европа. Поради температури кои ќе бидат над нормалата, се очекуваат помали врнежи од снег.
Враќање на поларниот вител
Поларниот вител се појавува секоја есен и игра клучна улога во развојот на временските обрасци за време на доцна есен, зима и пролет. Но, прво, да објасниме за што точно се работи.
Над половите на Земјата, и на север и на југ, во повисоките делови на атмосферата, во тропосферата и стратосферата, постојат постојани области со низок воздушен притисок наречени поларни вртлози или вител. Поларниот вител е најизразен во зимските месеци.
Вителот ротира спротивно од стрелките на часовникот со ветрови од 250 км/ч, приближно со иста брзина како ураган од петта категорија. Силниот поларен вител обично е проследен со силна поларна циркулација која заробува постуден воздух во поларните региони, што пак резултира со поблаги сезонски услови за поголемиот дел од Соединетите Американски Држави и Европа.
Спротивно на тоа, слаб поларен вител може да го наруши млазниот тек, што го отежнува задржувањето на студениот воздух што може да се пробие од поларните региони до САД или Европа во таква ситуација. Ова навлегување може да биде незгодно бидејќи за краток временски период доаѓа до значителен пад на температурите.
Според моделите ECMWF и JMA, на крајот на есента и почетокот на зимата нè очекува потпросечна јачина на поларниот вител. Ова укажува на понестабилни временски шеми и можни упади на постуден воздух во делови од САД и Европа.