Норвешка купува британски фрегати

Норвешка ја избра британската понуда за купување на идните фрегати, што е дополнителен удар за француската поморска група Навал, која пред неколку дена веќе беше исклучена од мега-договорот за подморници во Канада.

– Норвешка ќе купи британски фрегати за одбрана како дел од стратешкото партнерство со Велика Британија, изјави норвешкиот премиер Јонас Гар Стере на прес-конференција во Осло.

Покрај Велика Британија, со фрегатите тип 26 изградени од компанијата BAE Systems, и Франција, со фрегатите за одбрана и интервенција (FDI) од групата Naval, Германија и САД беа во конкуренција за испорака на пет или шест бродови, во договор проценет на повеќе од 100 милијарди круни (8,5 милијарди евра).

Британските и француските модели, кои некои во Норвешка ги критикуваа поради содржината на израелски компоненти, од почетокот се сметаа за фаворити.

Францускиот претседател Емануел Макрон, британскиот премиер Кит Стармер и канцеларот Фридрих Мерц ја посетија Норвешка во последните месеци за да ги промовираат своите понуди.

– Токму перформансите и блиското партнерство беа основата на нашето заедничко верување дека британската фрегата е најдобра, како и многу блиската интеграција меѓу норвешката и британската морнарица со текот на времето, рече Стере.

Норвешка, која е членка на НАТО, дели поморска граница во Баренцовото Море со Русија, која управува со моќна Северна флота во регионот.

Фрегатите тип 26, кои имаат противподморнички способности, ќе бидат испорачани на норвешката морнарица од 2030 година.

Овој избор, кој сè уште треба да го одобри норвешкиот парламент, претставува дополнително разочарување за француската група Naval, која Канада минатата недела веќе ја одби за договорот за изградба на 12 подморници. Тој договор ќе биде поделен меѓу германската компанија ThyssenKrupp Marine Systems (TKMS) и јужнокорејската компанија Hanwha Ocean, пренесе Бета.