Ни Кадиров не му верува на Путин

Односите меѓу претседателот Владимир Путин и чеченскиот лидер Рамзан Кадиров се заострија во последните неколку месеци откако Кремљ дозна за наводните тајни состаноци меѓу Кадиров и официјални претставници на Блискиот Исток, објави во четвртокот истражниот медиум IStories, цитирајќи ги поранешните и сегашните безбедносни службеници.

Според извештајот, Кадиров побарал гаранции од функционери од Блискиот Исток за да ги заштити неговото семејство и имотот доколку престане неговото владеење над Чеченија. Иако IStories не ги прецизира земјите кои се вклучени, забележува дека Кадиров има долготрајни врски со „муслиманските монархии“ во регионот.

Познато е дека чеченскиот лидер редовно патува во Обединетите Арапски Емирати, каде што во минатото користел елитна вила на вештачкиот остров Палма Џумеира како неофицијална чеченска „амбасада“ најмалку од 2014 година. Според извори на кои се повикува IStories, тој е сомничав околу гаранциите што му ги нуди Москва доколку се повлече од власта.

 Минатата година, „Новаја газета“ објави дека Кадиров боледува од сериозна болест, веројатно некроза на панкреасот. Според сегашните и поранешните офицери на Федералната служба за безбедност (ФСБ) кои сакале да останат анонимни, разузнавачката служба го информирала Путин за „неовластените“ разговори на Кадиров со претставници на Блискиот Исток во врска со безбедноста на неговите роднини и имот.

Неодамнешните политички маневри на Кадиров – вклучително и отстранување на неговата ќерка Аишат од позицијата заменик-премиер на Чеченија и пренесување деловни средства на членовите на семејството – дополнително ги поттикна шпекулациите дека тој можеби се подготвува да се повлече од владетел на регионот на Северен Кавказ.