Нетанјаху: Нема да има палестинска држава
Ерусалим – Израелскиот премиер Бенјамин Нетанјаху изјави дека „нема да има палестинска држава“ на церемонијата на потпишување на важен проект за понатамошна изградба на еврејски населби на Западниот Брег, пренесуваат западните медиуми.
– Ќе го одржиме нашето ветување: нема да има палестинска држава, тоа место ни припаѓа нам, рече Нетанјаху за време на посетата на населбата Маале Адумим на Западниот Брег.
„Ќе го зачуваме нашето наследство, нашата земја и нашата безбедност (…) Ќе го удвоиме бројот на жители на градот“, додаде израелскиот премиер.
Минатиот месец, Израел одобри клучен проект за изградба на 3.400 станбени единици на Западниот Брег, кој ОН и неколку странски лидери го осудија како преполовување на територијата на можната идна палестинска држава и загрозување на можноста за решение со две држави.
Израелскиот министер за финансии од редовите на екстремната десница, Безалел Смотрич, повика на забрзување на неговата имплементација и анексијата на Западниот Брег, како одговор на најавите на неколку земји за нивната намера да ја признаат државата Палестина.
Францускиот претседател Емануел Макрон во јули објави дека Франција ќе ја признае Палестина на седницата на Генералното собрание на ОН на крајот на септември. Неколку земји оттогаш изјавија дека ќе го сторат истото, вклучувајќи ги Канада, Австралија и Белгија.
Во светлината на војната на Израел во Газа, палестинската држава беше признаена, меѓу другите, од Ирска, Норвешка, Шпанија и Словенија.