Над 1.000 случаи на морбили регистрирани во Романија во мај

 Во Романија во мај се регистрирани 1.015 случаи на сипаници – морбили, соопшти Националниот институт за јавно здравје, пренесува Аџерпрес. Најголем број случаи се забележани во окрузите Васлуј (107), Бакау (95) во источна Романија и Сату Маре (88) во северозападна Романија.

Од 1 јануари 2023 до 31 мај 2025 година, во Романија се потврдени 34.650 случаи на морбили, вклучително 30 смртни случаи, покажуваат податоците на институтот. Во мај биле искористени 20.968 дози од вакцината MMR од националните резерви.

Во декември 2023 година, Романија прогласи епидемија од морбили на национално ниво за да овозможи вакцинација на деца на возраст од девет до 11 месеци, како и на невакцинирани лица, поради загрижувачкиот пораст на случаи. Во септември 2024 година, Министерството за здравство објави крај на епидемијата.