На Исланд за прв пат откриени комарци

Комарци се откриени во Исланд за прв пат досега, откако овој месец беа пронајдени три примероци во Ќос, рурална долина во близина на фјордот Хвалфјордур, објави Исландската национална радиодифузија.

Откритието првично го објави ентузијастот за инсекти Бјорн Хјалтасон во Фејсбук групата Skordyr a Islandi (Инсекти во Исланд). Примероците потоа беа испратени во Исландскиот институт за природна историја за анализа, каде што ентомологот Матијас Алфредсон потврди дека навистина станува збор за комарци.

Видот беше идентификуван како Culiseta annulata, комарец отпорен на студ, вообичаен во северна Европа. „Многу е веројатно дека комарците ќе станат постојани жители тука“, рече Алфредсон. „Овој вид обично ја поминува зимата во потопли и позаштитени места, како што се подруми и објекти за добиток.“

Иако комарците повремено пристигнувале во Исланд како слепи патници со авиони, ова е прв пат да бидат пронајдени како живеат и преживуваат во дивината на исландска почва.

Научниците со години предупредуваат дека комарците би можеле да станат постојани жители на Исланд, особено откако ситните мушички успешно се адаптираа на локалната клима во 2015 година.

Откривањето на комарци во Исланд, велат експертите, сугерира дека климатските промени и промените во животната средина им овозможуваат на видовите инсекти отпорни на студ да се шират подалеку на север од кога било досега.