Може ли војната да се префрли на територијата на Русија

Само неколку моменти откако на 1 април на видео камера беа забележани ракети истрелани од хеликоптери на ниско ниво, огнен пламен го зафати складиштето за гориво во рускиот град Белгород. Голем пожар избувна во воениот истражувачки институт во близина на Москва. Експлодираа уште неколку големи магацини низ Русија.

Овие и други слични инциденти на руска територија се можеби најинтригантните и најмистериозните настани што се случиле во последниот месец од војната во Украина. Ако ги изврши Украина, тие претставуваат дела на незамислива дрскост; еден од тие напади беше причината поради која се огласи првата сирена за воздушен напад на руско тло по Втората светска војна, пишува „Њујорк тајмс“.

Русија ја обвини Украина дека извршила хеликоптерски напад, а воените аналитичари сугерираат дека украинската саботажа предизвикала други пожари. Украина официјално не го коментираше нападот. Но, преку двосмислени коментари, некои украински функционери ја оставија отворена можноста за сопствена вмешаност.

Олексиј Арестович, советник на шефот на кабинетот на претседателот Владимир Зеленски, досега најотворено ја опиша политиката на неговата влада за нападите во Русија, нарекувајќи ја „стратегија на намерна двосмисленост“.

„Ништо не потврдуваме и ништо не негираме“, изјави советникот на шефот на кабинетот на украинскиот претседател.

Секоја ескалација на нападот врз Русија од страна на Украина може да има далекусежни импликации, да влијае на јавното мислење за војната во Русија и да го разбесни Кремљ до точка на целосна ескалација на конфликтот, рече Ендрју Е. Крамер, новинар на „Њујорк тајмс“ со долгогодишно искуство во регионот.

Пожарите во руските воени објекти, кои започнаа со хеликоптерски напад на 1 април врз складиште за гориво во Белгород, недалеку од украинската граница, фрлија нова непозната во воената равенка на војната. Таа укажува на можноста Русија, по неколкунеделна катастрофална штета на Украина, да почне да трпи загуби на своја територија.

Нападите доаѓаат во два облици: воени напади со хеликоптери во ниски летови во близина на границата и саботажа, длабоко во руската територија.

И додека некои пожари јасно укажуваат на напад или акти на саботажа – како што се два пожари што избувнаа во резервоари за гориво во Брјанск на 25 април – други остануваат необјаснети, при што ниту Русија ниту Украина не посочија дека на било кој начин се поврзани со војната.

Инцидентите покренаа дебата дали тие можат да го наведат рускиот народ да ја разбере војната, која засега може да ја гледа само на телевизија, преку пропагандните филтри на државната телевизија и со тоа да сфатат дека и самите се загрозени од политиката на Путин.

Постои, исто така, сценарио во кое пожарите и експлозиите би можеле да ги наведат Русите до натамошно хомогенизирање и дополнително да ја постават основата за општа мобилизација, што ќе му овозможи на Кремљ да испрати повеќе војници на боиштата.

Киев веќе, малку фаталистички, сигнализираше дека какви било контранапади против Русија се едноставно дел од војната што Русија ја започна.

„Ако сте решиле да извршите инвазија на друга земја, да извршите масовни убиства, да скршите мирни луѓе со тенкови и да ги поддржите убиствата, порано или подоцна ќе дојде време да го вратите тој долг. Така, разоружувањето на складиштето за убијци во регионите Белгород и Воронеж е само природен процес. Кармата е сурова работа“, изјави Михајло Подолјак, преговарач во тимот на украинскиот претседател Володимир Зеленски.

Руската војска, која два месеци непрекинато истрелува проектили кон украинските градови и воени цели, вклучително и складишта за гориво, на 13 април предупреди што ќе се случи ако Украина возврати.

Портпаролот на Министерството за одбрана Игор Конашенков изјави за руските новински агенции дека Русија ќе одговори со таргетирање на украинското раководство.

„Доколку овие случаи продолжат, руската војска ќе ги таргетира центрите за одлучување, вклучително и оние во Киев“, рече Конашенков.

Предупредувањето беше проследено со три големи пожари во Русија, вклучително и еден во близина на Москва, во Воениот истражувачки институт во Твер.

Експлозиите и хеликоптерските напади на руска територија го подигнуваат и моралот на Украинците. Откако ја сфатија ефикасноста на борбените тактики од мали размери за време на битката кај Киев во март, украинските команданти од среден ранг предложија да се продолжи оваа стратегија и во Русија.

„Војната нема да заврши додека не биде на руска територија. Не е тајна дека рускиот народ не ја поддржува војната. Не е точно дека само Путин е виновен, а останатите Руси се мирни. Мораме да го исплашиме руското општество. Нападот врз нивната земја би ја променил нивната перцепција. Луѓето како мене треба да бидат испратени во Русија“, изјави командантот на украинската бригада, кој побара да биде идентификуван само по прекарот Акула, бидејќи не е овластен да зборува јавно.