Москва и Вашингтон веќе преговараат за заеднички проекти околу ретките минерали

Директорот на Рускиот фонд за директни инвестиции, Кирил Дмитриев, изјави дека Москва и Вашингтон почнаа преговори за заеднички проекти на полето на ископување ретки минерали, како и други проекти во Русија.

– Ретките минерали се важна област на соработка и, се разбира, почнавме дискусии за различни проекти за ретки елементи и за други проекти во Русија – изјави Дмитриев за весникот „Известија“.

По преговорите меѓу САД и Украина за нацрт-договорот за украинските ретки минерали, претседателот на Русија, Владимир Путин, им предложи на САД заеднички да ги истражуваат руските наоѓалишта.

Дмитриев, кој беше дел од рускиот преговарачки тим за време на разговорите со американските претставници во Саудиска Арабија во февруари, наведе дека некои компании веќе покажале интерес за проектите. Тој не ги наведе имињата на компаниите, ниту, пак, наведе дополнителни детали.

„Известија“ објави дека за соработката може дополнително да се разговара на следната рунда руско-американски разговори, што би можело да се одржат во средината на април во Саудиска Арабија.

Ретките минерали и другите критични елементи, кои се од суштинско значење за високотехнолошките индустрии, го привлекоа глобалното внимание изминатите месеци бидејќи претседателот на САД, Доналд Трамп, се залага да се спротивстави на доминацијата на Кина во овој сектор.