Москва ги обвини војниците за сопствената смрт во Макиивка – користеле мобилни телефони

Бројот на загинатите руски војници во ракетниот напад на Макиивка се зголеми на 89 лица, изјави Сергеј Севрјуков, првиот заменик-началник на Главната воено-политичка управа на руските вооружени сили. Тој појасни дека при пребарувањето на урнатините биле откриени нови тела. Претходно беше соопштено за 63 загинати.

Според Севрјуков, главната причина за смртта била тоа што персоналот „масовно користел“ мобилни телефони и покрај забраната. „Овој фактор му овозможи на непријателот да ги лоцира и да ги одреди координатите за локацијата на воениот персонал за лансирање ракетен напад“, објасни тој.

Севрјуков додаде дека нападот на ХИМАРС врз зградата на стручното училиште во Макиика во Донецката област, каде што биле сместени мобилизираните, бил извршен во 00:01 часот по московско време – кога војската почнала да ги повикува роднините за да им ја честитаат Новата година. Две ракети беа пресретнати од системи за противвоздушна одбрана, четири ја погодија целта. Меѓу загинатите е и заменик-командантот на полкот, потполковник Бачурин.

Министерството за одбрана тврди дека американскиот ракетен лансер ХИМАРС бил  уништен со возвратен оган. Тие ветија и дека ќе ги идентификуваат виновниците и ќе ги изведат пред лицето на правдата.

Телеграмскиот канал ВЧК-ОГПУ, близок до агенциите за спроведување на законот, објави 270 загинати: вкупно повеќе од 400 луѓе се наоѓале на местото за сместување, а за преживеаните биле  130 вреќи за спиење. Заклучно со 12:00 часот на 3 јануари, според непотврдени информации, од урнатините се извлечени 196 тела и останки, за кои е потребно да се изврши ДНК преглед. Идентификацијата и регистрацијата на телата се врши во Центарот 522 во Ростов.

Масовната смрт во Макиивка е првата најголема еднократна загуба на војници, што е признаена од руското Министерство за одбрана од почетокот на војната во Украина. Во исто време, проруските воени дописници беа огорчени што властите се обидуваат да ја префрлат вината на самите војници. Првично, такви изјави дадоа претставници на самопрогласената Донецка Народна Република.

„Па, се разбира. Не е виновен командирот што дал наредба да се смести персонал во зградата на стручното училиште. Ниту оној што требало да даде наредба прво да се закамуфлира местото. Не е виновен ниту оној кој не дал наредба војниците да се сместат во подрумите. Се испотави дека за неволјата е виновен обичниот борец со телефон“, напиша Андреј Медведев, потпретседател на Московската градска дума и заменик-шеф на Вести при Серуската државна телевизија.

Најголемиот провоен телеграмски канал Рибар го наведе мислењето на самите мобилизирани, според кои командантот на полкот, полковникот Роман Еникеев, е одговорен за тоа што се случило. „Ние делумно не се согласуваме со нив: единствената грешка на полковникот е што тој слепо ги следеше упатствата на своите претпоставени и не можеше да постигне преселување на единицата што му беше доверена во согласност со реалноста на фронтот“, напиша Рибар. Авторите на каналот веруваат дека вината е во командата на првиот армиски корпус на народната милиција на самопрогласената ДПР.

Телеграмскиот канал „Греј зона“ поврзан со платеничката група „Вагнер“, исто така, ги нарече обвинувањата против загинатите војници „лага“, истакнувајќи дека Вооружените сили на Украина ги добиле информациите за локацијата на војската со помош на „тајни разузнавачки информации“.

Семјон Пегов, кој блогира под псевдонимот WarGonzo и беше лично одликуван со Орден за храброст од страна на рускиот претседател Владимир Путин во Кремљ на 20 декември, рече дека бројот на загинати во Макиивка е веројатно многу поголем од 89-те што сега официјално ги призна Русија.

„Списоците на исчезнатите се, за жал, значително поголеми“, рече тој.

Во средата Пегов рече дека, иако употребата на мобилни телефони во близина на првите линии на фронтот „очигледно“ не е добра работа, „приказната со „мобилните“ не е премногу убедлива“.

„Ова не е лично мислење, тоа е објективно“, рече тој.

Тој го нареше објаснувањето „еклатантен обид да се пренасочи вината“ и рече дека „веројатно ќе биде подобро“ функционерите да молчат до крајот на истрагата.

Тој праша како Министерството за одбрана може да биде „толку сигурно“ дека локацијата на војниците што сместуваат во училишна зграда не можела да се утврди со помош на надзор со беспилотни летала или локален информатор.

„Протекуваат координати на предмети, а важните движења на луѓето редовно се ‘соопштуваат’ до СБУ“, рече тој за Службата за безбедност на Украина.

„Мрежата работи, не спие“, рече Пегов.

„Ниту украинските беспилотни летала на небото над Донецк и Макиивка, кои можат да дадат не само информации за собирање на мобилизираните, туку и визуелно да ги потврдат“.

Тој, исто така, тврдеше дека војската на Украина нема да користи ракети ХИМАРС од американско производство, освен ако не е сигурна за својата цел.

„Ова е скапо оружје со висока прецизност. Пред да нападне со ХИМАРС, непријателот очигледно ја проверува информацијата“, рече тој. Украина не пука „само за среќа“.

Пегов уште еднаш го доведе во прашање официјалниот број на загинати во Русија, кој во вторникот вечерта беше зголемен од 63 на 89, што веќе го прави еден од најразорните поединечни напади против Русија во војната.

„За жал, нивниот број сè уште ќе расте“, рече тој.

Сергеј Миронов, копретседател на партијата Праведна Русија, побара сите виновни функционери да бидат кривично одговорни „според законите на војната“, „без разлика дали се во униформа или не“. „Тоа не се само оние кои дозволија престој на воениот персонал во незаштитен објект, им дозволија, како што велат, да го нарушат режимот на тајност, туку и сите повисоки органи кои не обезбедија соодветно ниво на безбедност во областа. Очигледно, ниту разузнавањето, ниту контраразузнавањето, ниту противвоздушната одбрана не функционираа како што треба“, рече тој.

Британското разузнавање исто така верува дека масовната смрт на руската војска во Макеевка сугерира дека командата не научила од лекциите од минатото.

Забележале дека од ударот целосно е уништена зградата на стручното училиште. „Со оглед на обемот на штетата, постои реална можност муницијата да била складирана во близина на трупите и да се активира за време на ударот, предизвикувајќи секундарни експлозии“, се вели во извештајот.

Покрај тоа, зградата се наоѓа на само 12,5 километри од Авдиивка, една од најжешките точки на конфликтот. „Овој инцидент покажува како непрофесионалните дејствија доведуваат до високо ниво на жртви“, додава разузнавањето.

Во меѓувреме, лидерот на регионот Донецк назначен од Кремљ, еден од четирите што Москва незаконски ги анектираше во септември, во средата ја пофали „храброста и вистинскиот херојство“ на загинатите руски војници.

Денис Пушилин во објава на Телеграм рече дека некои од убиените се обиделе да ги извлечат своите другари од запалената зграда.

Во Самара, во југозападна Русија, локалните жители во вторникот се собраа на православна служба во спомен на загинатите. Богослужбата беше проследена со едноминутно молчење, а цвеќе беше положено на споменикот на војната од советската ера, објави државната агенција РИА Новости. Непотврдени извештаи во медиумите на руски јазик велат дека жртвите биле мобилизирани резервисти од регионот. (Според агенциите)