Момче скршило сад стар 3500 години во музеј – таткото вели дека сакал да види што има внатре

Четиригодишно момче случајно скршило сад стар 3.500 години во музеј во Израел додека патувало со своето семејство. Музејот Хехт во Хаифа за Би-Би-Си изјави дека садот датира од бронзеното доба, помеѓу 2200 и 1500 година п.н.е., и дека тоа е редок артефакт бидејќи бил добро сочуван.

Садот бил изложен веднаш до влезот на музејот и не бил заштитен со стакло бидејќи музејот верувал дека тоа и дава на изложбата посебен шарм. Таткото на момчето, Алекс, рекол дека неговиот син го повлекол садот  бидејќи бил љубопитен да види што има внатре. „Бев во шок кога го видов како стои покрај скршената амфора“, рече тој.

Реакцијата на музејот
Музејот Хехт соопшти дека го поканиле семејството повторно да ја посети изложбата. „Кога некој намерно ги оштетува изложените предмети, ние го сфаќаме случајот сериозно, што понекогаш ја вклучува и полицијата“, велат од музејот.

„Сепак, ова не беше таква ситуација. Садот беше случајно оштетен од мало дете за време на посетата на музејот“, додава тој. Античкиот бокал ќе биде реставриран од стручен конзерватор и наскоро ќе се врати на своето место.

„Веќе нема да биде истата поставка“
Таткото на момчето рече дека ќе му олесни кога ќе го види реставрираниот сад, но дека му е жал бидејќи „тоа повеќе нема да биде истиот предмет“. Музејот за Би-Би-Си изјави дека, секогаш кога е можно, предметите се изложени без заштита или стаклени ѕидови и дека, и покрај овој инцидент, ќе продолжи со таа традиција.

Амфората потекнува од времето на библискиот крал Давид и цар Соломон, а веројатно имало вино или маслиново масло во него. Обично таквите садови се наоѓаат скршени, а целиот бокал е вредно откритие.