Истражување на Би-Би-Си: Во војната во Украина до сега загинале 128.115 Руси

Повеќе од 128.000 руски војници се потврдени како мртви во Украина од почетокот на инвазијата во 2022 година, според заедничка истрага на Би-Би-Си, порталот Медиазона и мрежа на волонтери, објавува Киев Пост.

На почетокот на септември, истражниот тим успеа да идентификува по име 128.115 руски војници кои загинале. Само во текот на јуни, јули и август оваа година, новинарите пронајдоа 23.305 нови некролози, а имаше и денови со дури 420 нови известувања за смрт, што е околу три пати повеќе од дневниот просек во 2024 година.

Би-Би-Си забележува дека објавените некролози не го одразуваат вкупниот број на смртни случаи во реално време, бидејќи извештаите за жртвите често се одложуваат и бараат дополнителна верификација. Истрагата откри дека 14% од идентификуваните мртви биле регрути од казнени колонии, додека 29% биле волонтери кои потпишале договори по почетокот на војната. Се вели дека процентот на волонтери „рапидно расте“ и сега го формира ‘рбетот на офанзивните сили на Русија.

Околу 11% од загинатите биле мобилизирани војници, иако се верува дека вистинската бројка е поголема бидејќи многу некролози не го означуваат воениот статус на починатите.

Москва и Киев ретко објавуваат официјални бројки за жртвите. Според украинските проценки, вкупните руски жртви, вклучувајќи ги загинатите и ранетите, надминале еден милион. Претседателот Володимир Зеленски на 12 август изјави дека руските загуби се околу три пати поголеми од украинските загуби, но не откри точни бројки за украинската страна.

Според Генералштабот на Украина на 5 септември, Русија изгубила 1.086.220 војници од февруари 2022 година, што е во согласност со проценките на западните разузнавачки служби. Во меѓувреме, Медиазона и Медуза, во посебна анализа, проценуваат дека најмалку 220.000 руски војници загинале од почетокот на инвазијата, користејќи ги податоците од регистарот на наследство како примарен извор.

Би-Би-Си и Медиазона првпат ја објавија својата потврдена база на податоци за жртвите во февруари 2025 година, на третата годишнина од војната, а волонтерите рачно ја проверуваат секоја записница за да се осигурат дека е точно.