Идентификувани се првите четири жртви од трагедијата во Швајцарија. Сите биле под 21 година

Швајцарската полиција ги идентификуваше првите четири жртви од катастрофалниот пожар што избувна во бар во познатиот скијачки центар Кран-Монтана на новогодишната ноќ. Во трагедијата, 40 лица ги загубија животите, а уште 119 беа повредени. Станува збор за две Швајцарки на возраст од 21 и 16 години и двајца Швајцарци на возраст од 18 и 16 години, а нивните тела се предадени на нивните семејства, пишува Би-би-си.

Болната идентификација продолжува
Кантоналната полиција Вале објави дека сложената постапка за идентификација е овозможена благодарение на интензивната работа на полицајците и Институтот за судска медицина. Работата за утврдување на идентитетот на преостанатите жртви продолжува, додека семејствата се соочуваат со мачно чекање за какви било информации за нивните најблиски кои сè уште се водат како исчезнати.

Според резултатите од прелиминарната истрага, најверојатната причина за пожарот биле прскалките на шишињата шампањ кои биле донесени премногу блиску до таванот на барот Le Constellation за време на новогодишната прослава, а кои содржеле лесно запалив материјал.

„Една од најлошите трагедии“
Швајцарскиот претседател Гај Пармелин го нарече настанот „една од најлошите трагедии“ што земјата некогаш ги доживеала. Деталите за идентификуваните жртви, вклучително и нивните имиња, сè уште не се објавени.

Претходно, млад голфер од Италија беше споменат како прва именувана жртва, но неговата смрт сè уште не е официјално потврдена од швајцарските и италијанските власти.