И израелски организации за човекови права гледаат израелски геноцид во Газа

Две водечки организации за човекови права со седиште во Израел, Б’Тселем и Лекари за човекови права, велат дека Израел врши геноцид врз Палестинците во Газа и дека западните сојузници на земјата имаат законска и морална должност да го спречат тоа.

Во извештаите објавени во понеделник, двете групи изјавија дека Израел ги таргетирал цивилите во Газа само поради нивниот идентитет како Палестинци во текот на речиси двегодишната војна, предизвикувајќи сериозна, а во некои случаи и непоправлива штета на палестинското општество.

Голем број меѓународни и палестински групи веќе ја опишаа војната како геноцидна, но извештаите на двете од најпочитуваните организации за човекови права во Израел и Палестина, кои со децении документираат системски злоупотреби, веројатно ќе го зголемат притисокот за дејствување.

Извештаите детално ги наведуваат злосторствата, вклучувајќи го убиството на десетици илјади жени, деца и стари лица, масовно присилно раселување и гладување, како и уништувањето на домовите и цивилната инфраструктура што ги лиши Палестинците од здравствена заштита, образование и други основни права.

Ниту претседателот на САД, Доналд Трамп, не му верува на Тел Авив дека нема глад во Газа и нема разбирање за монструозните изјави дека ниту една земја „не ги хранела непријателите“, ниту пак Хитлер ги хранел нив.  Трамп од Шкотска изјави дека верува оти има глад во Газа и дека му рекол на Израел дека „можеби мора да го сторат тоа на поинаков начин“.

Зборувајќи пред својот хотел во Тарнбери, Јужен Ершир, американскиот претседател рече дека луѓето во Газа треба „веднаш да добијат храна и безбедност“ и дека сака повторно да започнат разговорите за прекин на огнот.

На прашањето дали се согласува со израелскиот премиер, Бенјамин Нетанјаху, кој претходно во понеделник изјави дека нема глад во Газа, Трамп одговори: „Не знам. Врз основа на телевизијата, би рекол не баш, бидејќи тие деца изгледаат многу гладни. Ние даваме многу пари и многу храна, а другите нации сега се вклучуваат“.

На прашањето дали Израел направил сè што можел за да избегне цивилни жртви, Трамп рече:

„Никој не направил ништо големо таму. Целото место е хаос… Му реков на Израел можеби мора да го сторат тоа на поинаков начин“.

Зборувајќи заедно со Трамп, Кир Стармер рече дека настаните во Газа се „вистинска хуманитарна криза“ и „луѓето во Велика Британија се револтирани од она што го гледаат на своите екрани“.

Претседателот на САД рече дека не верува дека Хамас ќе ги ослободи преостанатите израелски заложници што ги држи и дека САД „дале многу пари на Газа за храна и сè друго, многу од тие пари се украдени од Хамас и многу од таа храна е украдена“.

Запрашан за посветеноста на британската влада да ја признае палестинската држава, Трамп рече: „Нема да заземам став, не ми пречи тој [премиерот] да заземе став. Барам да се нахранат луѓето токму сега“.

 Даунинг стрит посочи пред состанокот дека Стармер ќе изврши притисок врз Трамп да заземе построг став кон Израел и да се заложи за продолжување на разговорите за прекин на огнот. Стармер е под притисок од високи членови на неговиот кабинет и над една третина од неговите пратеници веднаш да ја признае палестинската држава. Се очекува Дејвид Лами, министерот за надворешни работи, да присуствува на конференцијата на ОН во Њујорк оваа недела, која се одржува за да разговара за излез од кризата.