Еколози ја испрскаа со боја фасадата на црквата Саграда Фамилија во Барселона

Две климатски активистки денеска ја испрскаа со црвена боја фасадата на црквата Саграда Фамилија во Барселона, протестирајќи против неактивноста за решавање на климатската криза, која еколозите ја сметаат за одговорна за шумските пожари што ја опустошија Шпанија.

Во видео снимка објавена од здружението Futuro Vegetal на социјалните мрежи, се гледаат активистите како ги апсат припадници на обезбедувањето откако со боја го испрскаа дното на столбот на познатата катедрала, извикувајќи „Климатска правда“.

– Со овој протест, еколошката група го осудува недостигот на акција од страна на владата против климатската криза и нејзините последици врз пожарите што ова лето ја опустошија Шпанија и поголемиот дел од Европа, наведе Futuro Vegetal.

Саграда Фамилија, проектирана од архитектот Антони Гауди (1852-1926), која сè уште не е завршена, е една од главните атракции на Барселона.

Во август, Шпанија претрпе бран драматични шумски пожари во кои загинаа четири лица и беа опустошени повеќе од 350.000 хектари.

Овие пожари претставуваат „една од најголемите еколошки катастрофи“ што земјата ги доживеала во последните години, наведе шпанската влада, која нивниот обем го поврза со климатските промени.

Futuro Vegetal во последните години спроведе десетици слични протести, кои многу музеи ги осудија како вандализам, вклучувајќи еден од 2022 година во кој нејзините активисти ги залепија своите раце на рамки на слики од шпанскиот мајстор Франциско де Гоја во музејот Прадо во Мадрид.