ЕК очекува дозвола за употреба на Ремдесивир до крајот на неделава

Белгија – Европската комисија се надева дека одлуката за дистрибуција на првиот лек во ЕУ против Ковид-9 ќе биде објавена пред крајот на оваа недела, изјави претставник на ЕК.

– Заштитата на здравјето е основен приоритет за ЕК. Затоа го забрзавме процесот за давање овластување за дистрибуција (во ЕУ) на Ремдесивир, така што ќе биде достапен за луѓето од заедницата. Се надеваме дека оваа дозвола ќе биде дадена до крајот на неделава, рече тој.

Европската агенција за лекови (ЕМА) на крајот на јуни препорача да се одобри продажбата на првиот лек во Европската унија против Ковид-19, Ремдесивир. Во соопштението на ЕМА се вели дека Европската комисија ќе го забрза процесот на донесување одлука за пристап на пазарот на овој лек.

Американската администрација на претседателот Доналд Трамп ги купи скоро сите количества на лекот Ремдесивир во светот во наредните три месеци, кој се покажа како ефикасен во лечење на Ковид-19.

Експертите се вознемирени од таа одлука стравувајќи што ќе се случи кога некогаш ќе се појави вакцината за коронавирус.

Лекот кој првобитно е развиен за ебола ја произведува фирмата Џилид Сајенсис. Лекот е прв кој американската агенција за лекови го одобри за употреба во лечењето на коронавирус, пренесува Би-Би-Си.

Просечната терапија за лечење предвидува шест дози со вкупна цена од 3.200 долари.

Претседателот Трамп склопил договор со Џилид за 500 илјади дози што е 100 отсто од производството во јули, 90 отсто во август и 90 отсто во септември, соопшти американското министерство за здравство.