Повеќе од 240 заразени со вирусот Западен Нил во Европа

Оваа година е потврдено дека повеќе од 240 луѓе низ Европа се заразени со вирусот Западен Нил. Според неделниот извештај објавен во петок од Европскиот центар за превенција и контрола на болести (ECDC), вкупно 241 случај на инфекција се регистрирани од почетокот на сезоната на пренос на вирусот до среда.

ECDC вели дека 139 случаи се регистрирани во Италија и 61 во Грција. Други инфекции се регистрирани во Шпанија, 17 од нив, додека 13 случаи се регистрирани во Северна Македонија. Романија имаше шест случаи, Франција четири, додека Германија регистрираше еден случај.

Кон крајот на минатиот месец, Светската здравствена организација (СЗО) повика на зголемена будност откако беа пријавени неколку случаи на треска Западен Нил во јужна Европа. Според СЗО, вирусот Западен Нил обично се пренесува меѓу комарци и птици. Сепак, заразените комарци можат да каснат и да ги инфицираат луѓето, најчесто помеѓу јули и септември.

Повеќето заразени луѓе не се ни свесни дека го имаат вирусот
Според Институтот Роберт Кох (RKI), германската агенција за контрола и превенција на болести, повеќето заразени луѓе не се ни свесни дека го имаат вирусот. Затоа, истражувачите претпоставуваат дека има голем број непријавени случаи.

Во потешки случаи, болеста може да влијае на нервниот систем и да доведе до состојби како што се енцефалитис и менингитис. Не постои вакцина или лек за вирусот. Лекарите можат само да ги третираат симптомите.

СЗО им советува на патниците да го намалат ризикот од каснувања од комарци со носење соодветна облека и користење репеленти против комарци.