Дипломатски скандал: Делегацијата на ЕУ се обиде да одржи состанок со воениот лидер во Либија и беше прогласена за непожелна

Обидот на Европската Унија да координира план за запирање на протокот на мигранти од Северна Африка се претвори во меѓусебни обвинувања во средаta, откако висок бриселски функционер беше принуден, од воен водач поддржан од Русија, да ја напушти Либија .

Европскиот комесар за миграција Магнус Брунер беше прогласен за персона нон грата и протеран од Бенгази во вторник, што е очигледно кршење на дипломатскиот протокол. Брунер предводеше делегација од високи функционери на ЕУ, вклучувајќи министри од Италија, Малта и Грција, за да разговараат за напорите за запирање на протокот на илјадници мигранти од Либија кон Европа.

Со оглед на тоа што нерегуларната миграција се смета за клучен тест за способноста на ЕУ да одговори на загриженоста на гласачите за безбедноста на границите, неуспехот на мисијата на Брунер се заканува сериозно да го поткопа кредибилитетот на Европската комисија, пишува Политико.

Кризата се разви кога делегацијата на ЕУ прво ја посети меѓународно признатата влада во Триполи, во западна Либија, а потоа отпатува во Бенгази, на истокот од земјата, кој е под контрола на воениот водач поддржан од Русија, Калифа Хафтар.

Тимот на ЕУ инсистираше дека сака да разговара исклучиво со Хафтар и одби средби со други претставници од владата во Бенгази. Сепак, Хафтар, иако е моќна воена фигура, формално не е шеф на цивилната администрација и побара високи министри од неговата администрација да се приклучат на состанокот.

Ова предизвика криза за делегацијата на ЕУ, бидејќи претходно јасно ставија до знаење дека не можат да одржат состаноци со претставници на источната либиска администрација, која не е признаена од Обединетите нации.

Според извор запознаен со развојот на настаните, делегацијата на ЕУ првично одбила средба со министрите, но потоа се согласила под услов да не фотографираат. Хафтар одбил и ја избркал европската делегација.

Претставник на Европската комисија изјави дека се свесни за ризикот од можна стапица за делегацијата.

Сепак, тие веруваа дека Хафтар би сакал да ја искористи можноста да биде третиран како легитимен соговорник на ЕУ, отколку да се обиде да ги принуди претставниците на ЕУ да се фотографираат со неговите министри. Друг претставник на Европската комисија оцени дека она што се случило е „дефинитивно грешка“ и повика на преиспитување на одговорноста во рамките на Комисијата.

Во среда, претставници од Атина и Рим го обвинија Брисел и неговата дипломатска служба, додека некои од соработниците на Брунер од самата Комисија признаа дека страната на ЕУ „направила грешка“.

Грчката влада објави дека ќе ги продолжи своите преговори со Либија и воведе итни мерки поради зголемувањето на пристигнувањата на мигранти на островот Крит. Министерот за надворешни работи на Грција, Јоргос Герапетритис, рече дека има „организациски проблем што довел до кршење на дипломатскиот протокол“.

Италијанскиот министер за внатрешни работи, Матео Пјантедози, кој беше дел од делегацијата, изјави дека состанокот е откажан во последен момент поради „незадоволството на либиската страна, предизвикано од претераниот пристап на некои функционери во европската делегација“.

Двете делегации се согласуваат дека проблемот потекнува од Брисел, односно дека виновниците се службениците на Европската Унија.

„Имаше проблем со протоколот во Бенгази, поради што планираните состаноци не можеа да се одржат. ЕУ ќе ги држи отворени комуникациските канали и ќе продолжи да работи во духот на пристапот „тимска Европа“ со сите вклучени актери“, рече портпаролот на Европската комисија.