Давос е мртов
Повторно е одложена најелитната конференција во светот. Чувајте го кавијарот и вратете го визонот во плакар. Давос е повторно мртов. Блескавиот и со нетрпение очекуваниот годишен состанок на Светскиот економски форум, закажан за швајцарското планинско одморалиште на 17-21 јануари, е откажан втора година по ред и заменет со серија онлајн дискусии.
Одложувањето – поради појавата на Омикрон – е последниот од серијата неуспешни напори да се одржи во живо состанокот, што се одразува финансиски на организаторите. Во 2020 година, конференцијата на WEF во Давос привлече повеќе од 100 милијардери и 53 шефови на држави или влади. Компаниите – сè уште претежно од САД и Европа – плаќаат околу 50.000 долари по лице за посакуваната „бела значка“ за пристап до оваа листа на гости.
Приходите од надоместоците за настани на WEF паднаа од околу 45 милиони долари во 2020 година на нула во 2021 година. Надоместоците за членство и партнерства се движат од 65.000 до 650.000 американски долари, „во зависност од нивото на ангажираност“. Приходите од членарината се намалија за 7,5 милиони долари во 2021 година, при што некои од компаниите како Бритиш Телеком, европски телекомуникациски гигант, ги прекинаа врските. „Одлучивме да го прекинеме нашето партнерство оваа година“, изјави Ричард Фарнсворт, портпарол на БТ, за Политико.
Локалните бизниси во Давос – градот на најголема височина во Европа – во голема мера зависат од приливот на богати посетители секој јануари. И покрај тоа што на секоја компанија и се дозволени само пет носители на бели значки, придружба на директори, асистенти, возачи и готвачи од пониско ниво може да бројат повеќе од 100 за најголемите компании што присуствуваат. Продавниците и баровите се претворени во сложени павилјони и изложбени простори, додека цената за кревет на спрат во апартман е близу 1.000 долари за ноќ. Не прашувајте за цените на вилите.
Организаторите се надеваат дека ќе ја презакажат конференцијата во Давос во 2022 година во текот на летото, но сличен план за преместување на настанот пропадна во 2021 година. Клаус Шваб, извршниот претседател на WEF објави со помпа во декември 2020 година дека зимската конференција во Давос ќе се пресели во Сингапур во мај 2021 година како начин да се избегне пандемијата. Тој план потоа беше одложен до август 2021 година и на крајот беше целосно откажан по локалниот пораст на случаите „Ковид-19“.
Аманда Русо, портпарол на WEF, го минимизираше влијанието на одложувањето на конференцијата во 2022 година.
„Годишниот состанок е само една точка на допир заедно со секојдневната работа на нашите речиси 20 платформи. Нашите партнери се потпишуваат како членови да работат во текот на целата година“, изјави Русо.
По појавата на варијантата Омикрон во ноември, WEF се обиде да издејствува пауза до неделата по закажаниот настан во јануари, бидејќи новото швајцарско правило бара 10-дневен карантин за странските посетители што би ја прекинало конференцијата во Давос. Стотици директори секоја година слетуваат во швајцарското планинско одморалиште на конференцијата, многу од нив со приватни авиони, а некои од нив за само 24 часа, што е распоред некомпатибилен со карантинот. Дури и со пауза на правилата за карантин, планерите на настаните во Давос беа преплавени во последниве недели од низа променливи локални ограничувања, вклучително и сериозни ограничувања на бројот на присутни на приватни настани и загриженост дека настанот на крајот ќе биде откажан.
„Волстрит журнал“ и CNBC ги откажаа плановите за нивните редовни павилјони и простори за дневен престој. Компаниите како JPMorgan во меѓувреме се прашуваа дали да продолжат со нивните вечерни приеми во пештерски локални уметнички галерии, ако тие простори треба да останат речиси празни за да се усогласат со правилата на Ковид.
WEF се обиде да ги увери своите гости дека настанот ќе продолжи. И покрај тоа, редовните присутни во Давос останаа скептични дека настанот може да продолжи според планираното.
„Како кризен менаџер, во нашата препорака до клиентите сепак имавме сценарио за судниот ден“, рече еден консултант во фирма за лобирање и јавни работи во Вашингтон. „Тоа едноставно мора да го направите во 2022 година година, или „2020 година, трет дел“, како што јас го нарекувам“. (Политико)