Дали зелената технологија полека нè труе: Посебен ризик од неколку болести

Како што светот брзо се свртува кон технологии со ниски емисии, како што се електричните автомобили и соларните панели, се појавуваат нови предизвици.

Иако овие иновации ветуваат подобар квалитет на воздухот и во борбата против климатските промени, експертите предупредуваат на скриените ризици поврзани со клучните суровини – технолошки критичните елементи (TCE).

Според новото истражување на интердисциплинарен тим на истражувачи од Медицинскиот универзитет во Виена, овие елементи, кои често се користат во електричните мотори и соларните панели, можат да претставуваат сериозна закана за животната средина и здравјето на луѓето.

Резултатите од истражувањето укажуваат дека зголемената употреба на овие материјали може да доведе до нивно значително акумулирање во урбаните средини.

Технолошки критичните елементи припаѓаат на ретките хемиски елементи кои се клучни за напредните технологии. Нивната експлоатација и преработка веќе имаат сериозни еколошки последици. Сепак, истражувачите за прв пат анализираа како овие елементи може да се испуштат во животната средина за време на секојдневната употреба на технологии.

„Нашите модели покажуваат дека без соодветни мерки, електрификацијата на возилата би можела да ја удвои потрошувачката на технолошки критичните елементи до 2060 година“, истакна др. Даниел Халуза.

Во тој период, до 15,7 тони од овие елементи би можеле да бидат ослободени во атмосферата поради корозија на возилата и атмосферски влијанија на соларни панели. Овие елементи може да завршат во воздухот, водата и почвата, што го зголемува долгорочниот ризик од респираторни, кардиоваскуларни, па дури и невролошки проблеми.

Самото преминување кон зелена енергија не е доволно – потребни се дополнителни мерки за заштита на здравјето и животната средина.

„Треба да ја намалиме вкупната побарувачка за ресурси за да спречиме можни здравствени катастрофи во иднина“, рече Халуза.

Клучниот чекор кон одржливиот развој вклучува намалување на индивидуалниот автомобилски сообраќај и поголема промоција на јавниот транспорт. Дополнително, со инвестирање во технологии за поефикасно рециклирање на технолошки критичните елементи, нивното негативно влијание може значително да се намали.

Студијата, исто така, ја нагласува потребата од интердисциплинарни истражувања за подобро разбирање на динамиката на овие елементи во урбаните средини, а во исто време е предупредување и потсетување дека зелените технологии мора да се користат со грижа за здравјето на луѓето и животната средина. Иднината не е само во технологијата, туку и во одговорниот пристап кон нејзиниот развој и употреба.