Брендот BlackBerry би можел да се врати на пазарот на мобилни телефони

Легендарниот бренд за мобилни телефони наречен BlackBerry, кој меѓу другото е познат и по физичките QWERTY тастатури, би можел да се врати на пазарот.

Откако ги лансираше моделите како што се BlackBerry KEYone, BlackBerry KEY2, BlackBerry KEY2 LE и BlackBerry Motion под лиценца од името на Blackberry, кинескиот производител TCL одлучи да се откаже од убедувањето на клиентите дека телефоните со Android на BlackBerry можат да бидат конкурентни во индустријата за паметни телефони. Но, кога се чинеше дека легендарниот бренд е „мртов“, компанијата од никаде повторно се појави со намера да го „оживее“.

Шест месеци подоцна, во август 2020 година, Onward Mobility објави дека постигнал договор за лиценцирање на името BlackBerry за производство на нови паметни телефони, кои требаше да се појават во првата половина на 2021 година. Овие требаше да бидат првите телефони со името BlackBerry што ќе ја поддржуваат мрежата 5G. Сепак, ништо не излезе од тоа, бидејќи уредите не се појавија на пазарот. Во февруари 2022 година, BlackBerry ги продаде своите патенти за мобилни телефони за 600 милиони долари. Неколку недели подоцна, Onward Mobility објави дека сонот за лансирање на 5G уредите на BlackBerry е завршен.

Оттогаш не се слушна многу од BlackBerry, освен извештаите за лансирањето на тастатурата Clicks, која додава физичка QWERTY тастатура на одредени модели на iPhone и телефони со Android. Но, сега постои надеж дека BlackBerry ќе го оживее својот бизнис со мобилни телефони. На Reddit е објавена информација во која се наведува дека британска компанија разговара со инвеститори во обид да собере пари.

Планот е да се продолжи онаму каде што застана Onward Mobility. Со други зборови, компанијата сака да го врати името BlackBerry на пазарот на паметни телефони и да понуди BlackBerry уреди со поддршка за 5G мрежа, кои би имале физички QWERTY тастатури.

Корисникот на Reddit тврди дека неговата компанија потпишала договор за необјавување, па затоа не можел да го открие нејзиното име, ниту детали за дизајнот на првиот 5G смартфон BlackBerry. Сепак, тој веќе има увид во дизајнот и некои спецификации и објави изменета слика од екранот.

Ако му се верува, првиот BlackBerry паметен телефон на стартапот ќе има AMOLED екран (големината не е одредена), 12 GB RAM и 256/512 GB внатрешна меморија. Дел од него ќе биде капацитивна физичка QWERTY тастатура и ќе поддржува 5G мрежи и генеративни способности за вештачка интелигенција. Ќе го користи и оперативниот систем Андроид 15.

Очигледно, постои план кој вклучува повеќе производи со физички QWERTY тастатури. Не се откриени временски рамки, но тешко е да се поверува дека ќе чекаме помалку од неколку години за првиот BlackBerry. Компанијата која моментално ги поседува патентите на BlackBerry е Malikie Innovation. На нејзината веб-страница се наведува дека е подготвена да лиценцира 32.000 патенти купени од BlackBerry.