Би-Би-Си: Ова е пресвртница во тензиите на границата на НАТО

Лондон – Соборувањето на беспилотните летала што го нарушиле полскиот воздушен простор за време на рускиот напад врз соседна Украина претставува потенцијална пресвртница во тензиите на источната граница на НАТО, пишува Би-Би-Си.

Доколку се потврди дека објектите се руски, тоа ќе биде првпат од почетокот на војната во Украина во 2022 година членка на Алијансата да дејствува директно против руски авиони над својата територија.

Најновото навлегување на руски беспилотни летала во воздушниот простор на Полска тешко може да се смета за случајна грешка, смета Џим Таунсенд, поранешен заменик-помошник секретар за одбрана на САД. 

Во интервју за Би-Би-Си, Таунсенд нагласи дека овој инцидент претставува сериозен тест за целиот НАТО сојуз.

-Еден дрон е грешка, повеќе беспилотни летала не се грешка, изјави тој за Би-Би-Си, додавајќи дека на Полска треба да ѝ се даде време темелно да истражи што се случило. 

„Мораме да ѝ дадеме на Полска повеќе време да разбере што откриваат и да видиме какви се нивните ставови“.

Таунсенд верува дека инцидентот најверојатно бил намерна провокација. 

-Но, ова е повеќе од веројатно тест – ова е тест на кој НАТО мора да одговори, истакна тој.

Како позитивна страна, тој го издвои фактот дека Полска и НАТО се чинеше дека ја имаат ситуацијата под контрола. 

-Тие беа откриени на полскиот радар и НАТО одговори, рече Таунсенд, заклучувајќи дека сега одговорноста е на политичкото раководство на алијансата. 

„Сега политичката страна на НАТО е под притисок да обезбеди соодветен одговор од алијансата“.

Полските борбени авиони полетаа како одговор на заканите од почетокот на конфликтот, но досегашните инциденти главно вклучуваа руски беспилотни летала што го користеа полскиот воздушен простор како транзитна рута до цели во Украина.

Досега, официјална Москва не објави ништо за инцидентот. Рускиот претседател Владимир Путин постојано отфрла каква било намера за започнување војна против земјите-членки на НАТО, иако многу западни претставници ги сметаат таквите изјави за спротивни на реалните проценки на ситуацијата на терен.