Австриската ОМВ ја напушта Словенија и продава 120 бензински станици

Австриската енергетска компанија ОМВ ја објави својата намера да го продаде словенечкиот дел од компанијата, како дел од оптимизацијата и преструктуирањето на деловните активности, јавија словенечките медиуми.

Според извршниот директор на ОМВ Рајнер Силе компанијата сака да се ослободи од филијалата во Словенија како дел од поширокото преструктуирање и оптимизација на бизнисот, откако нејзината продажба и профит паднаа за околу една третина во споредба со 2019 година минатата година, поради пандемијата, и затоа што ОМВ во Словенија не ги продава своите бензини и дизел горива на своите станици.

Со 120 бензински пумпи, ОМВ е втор по големина дистрибутер на нафтени производи во Словенија, по љубљанскиот „Петрол“, кој има околу 300.

Според европските правила за конкуренција, Петрол не може да ги преземе услугите на ОМВ затоа што би станал монопол на релативно мал пазар, а се спекулира во медиумите дека потенцијален купувач на акциите на ОМВ може да бидат унгарски Мол и руски Лукоил, кои веќе имаат помали удели на пазарот во Словенија.

ОМВ е присутна во Словенија од 1992 година, кога заедно со поранешниот Истрабенз и ИНА, ја основаа ОМВ Истрабенз, купувајќи ја нивната дистрибутивна мрежа.