(ФОТО) Апокалиптични фотографии од Скопје: Денеска е најзагаден град во светот

Утринава скопјани се разбудија во мрак од густа магла, не се гледа прст пред око и тешко се дише. Мерните станици на Министерството за животна средина, во скопското подрачје покажуваат енормно загадување на воздухот. Многу високо ниво на канцерогените ПМ10-честички и ПМ2,5-честички има во Центар, Карпош, Лисиче, Гази Баба и Ректорат.

Фоторепортерот на Независен весник преку својот објектив ја доловува оваа апокалиптична слика досега.

Според апликацијата за мерење на квалитет на воздух утринава Скопје беше најзагедниот град во светот. Според „Ер Вижуал“ Скопје во загаденост ги надмина и Индија, Пакистан и Бангладеш, кои деновиве доминираа по загаденост.

Најголемо загадување, утринава, покажала мерната станица кај Ректорат. Таму се измерени 395 микрограми ПМ10 честички на еден метар кубен.

Неколкупати повисоки концентрации на ПМ10 честичките беа регистрирани на сите мерни станици. Според апликацијата Мој воздух, енормно големо загадување има и во населбата Карпош, каде се измерени 383 микрограми ПМ10 честички на еден метар кубен. Во Лисиче, измерени се 291 микрограми ПМ10 честички на еден метар кубен.

Максималната граница, пропишана од Европската Унија за присуство на ПМ10 честички во воздухот е 50 микрограми во период од 24 часа.

Градоначалникот на Скопје, Петре Шилегов, вчера изјави дека „постапката за чиста животна средина и за чист воздух не е постапка со филмска брзина, ниту, пак, настап во риалити шоу. Тоа е комплексна работа на која сите треба да се посветат, а и да се откажат од едни навики, доколку се сака да се има здрава животна средина“.

Една од мерките што се преземени, рече Шилегов, е затворање на печката на Дрисла, како и неколку изречени казни од страна на инспекторите кои се на терен и вршат надзор. Но, тој најави и нова мерки која утре ќе ја презентира на прес-конференција.

Министерот за животна средина, Садула Дураку изјави дека проблемот со загадувањето не може да се реши преку ноќ.

-Оваа Влада и Министерството за животна средина сакаат системски да ги решаваат проблемите. Проблемите не се решаваат преку ноќ и со волшебно стапче, вели Садула Дураку.

Поради појава на магла, видливоста на патниот правец Скопје – Катланово изутринава е намалена на 50 до 100 метри, соопшти АМСМ.
Сообраќајот на патиштата се одвива по влажни коловози. Интензитетот на патните правци надвор од градските средини е умерен, а на граничните премини нема подолги задржувања за влез и за излез од државата.

АМСМ потсетува и дека од 15 ноември стапи во сила законската обврска за задолжително поседување зимска опрема во возилата, без оглед на временската состојба. Оваа обврска ќе трае до 15 март 2018 година.

фото: Борис Грданоски