Собранието им го одзеде имунитот на шестемина пратеници

Собранието на Република Македонија го одобри барањето на Кривичниот суд за одземање на имунитетот на пратениците Крсто Мукоски, Јохан Тарчуловски, Жаклина Пешевска, Љубен Арнаудов, Љупчо Димовски и Сашо Василевски, поради притвор за насилствата во Парламентот на 27 април годинава.

За одземање на мандатот гласаа 66 присутни пратеници на денешната 25 седница.

Пратеничката група на ВМРО-ДПМНЕ не учествува на седницата. Според нив, седницата е „политичка фараса, чија единствена цел е реваншизам, сеење омраза и уништување на сите оние кои што мислат различно“.

Со денешното гласање заврши постапката предвидена со Деловникот на Собранието и Уставот за симнување на имунитетот на шестемина пратеници. Тие, сепак, според македонската легислатива и Уставот, ќе останат на пратеничката функција се додека евентуалната пресуда на Кривичниот суд не стане правосилна и ако бидат осудени за кривично дело за кое е пропишана казна затвор во траење од најмалку пет години.

Крсто Мукоски, Јохан Тарчуловски, Жаклина Пешевска, Љубен Арнаудов, Љупчо Димовски и Сашо Василевски се дел од 36-те лица кои Основното јавно обвинителство ги гони за „терористичко загрозување на уставниот поредок и безбедноста“, во врска со настаните од 27 април годинава во Собранието на Република Македонија.