Собир пред Собранието за Никола Саздовски

Мирен собир се одржа вечерва пред Собранието на Република Македонија за прерано починатиот Никола Саздовски.

Протестот беше организиран преку иницијатива на социјалната мрежа Фејсбук „Минута молк за Никола Саздовски“.

Присутните пред фотографија од починатото момче поставена на троатарот пред Собранието, палеа свеќи. Меѓу присутните беа и членови на навивачката група „Комити“, чиј член беше Саздовски, како и претседателот на опозициската ВМРО-ДПМНЕ Христијан Мицкоски, кој дојде облечен во дрес на Вардар. .

Мицкоски по оддавањето почит, го соблече дресот и го остави на масата каде беше поставена фотографија со ликот на Саздовски.

Дваесет и едногодишниот Саздовски вчера изутрина во Клиничкиот центар им подлегна на повредите со кои се здоби на 29 јуни во физички напад од страна на три момчиња на автобуската постојка на бул. „Александар Македонски“ во Скопје.