Презентирани локациите за нов Универзитетски клинички центар во „Ѓорче Петров“ и Петровец

Градоначалниците на општините „Ѓорче Петров“ и Петровец Александар Наумовски и Борче Митевски денеска ги презентираа предлог локациите за нов Универзитетски клинички центар пред министерот за здравство Венко Филипче, пред претставници од Комората на овластени инженери и архитекти, Асоцијацијата на архитекти, Катедрата за урбанистичко планирање при Аритектонскиот факултет Скопје, Проектната единица при Министерствотот за здравство, стручни лица и консултанти од сферата на урбанизмот, планирањето на просторот и архитектурата, како и пред кабинетот на Претседателот на Владата на РМ Зоран Заев.

Како што соопштија од Министерството за здравство, по извршените презентации од општините се отворила дискусија, на која се разговарало за сите важни аспекти за еден ваков капитален јавен здравствен објект, сообраќајната поврзаност со градското подрачје и другите делови од државата, инфраструктурните потреби на кампусот, економско – финансискиот аспект, заштита на животната средина, …

-За ваков голем проект од национален интерес како што е Клиничкиот центар, ја вклучуваме и опозицијата во дебата. Нема партиски, национални или други разлики за изградба на новиот Клинички центар. Потребна е координација, интерактивно и ускладено функционирање, истакнал министерот Филипче.