ОЈО Свети Николе ги истражува причините за сообраќајката кај Мамутчево


Основното јавно обвинителство од Свети Николе ги истражува причините за вчерашната сообраќајна несреќа на магистралниот пат Велес – Штип. Како што МИА веќе објави кај селото Мамутчево дојде до судар меѓу автобус, сопственост на фирмата „Кит Го“ од Штип, управуван од возач од Велес (54) и камион влекач со полуприколка со регистарски ознаки од Скопје, управуван од жител на Скопје (31).

Во несреќата лесно и потешко се повредени 22 патници од автобусот.

Како што наведува светинсиколското ОЈО, возачот на камионот се здобил со тешки телесни повреди и поради нивната сериозност од болницата во Велес е испратен на скопските клиники.

Согласно дадените насоки од надлежен јавен обвинител од Основното јавно обвинителство Свети Николе, увидните екипи од Министерството за внатрешни работи извршија обезбедување на траги од лице место. Дополнително ќе биде извршено и сообраќајно техничко вештачење.

ОЈО издало и наредба за проверка на присуство на алкохол во крвта на двајцата возачи.​