Митко Јанчев доби закани по живот да не гостува во емисијата 24 Отворено

Поранешниот потпретседател на ВМРО-ДПМНЕ, Митко Јанчев, кој неодамна беше разрешен од раководството на партијата вечерва не пристигнал во емисијата „Отворено“ поради смртните закани што ги добиле членовите на неговото семејство.

Јанчев телефонски се вклучи во емисијата и појасни дека закани добиваат тој и членови на неговото семејство од пред референдумот, а вечерва закана по телефон добила неговата сопруга.

-Тоа беше една од причините да не присустувам, бидејќи сакам да бидам со семејството. Сите закани ги имам пријавено во полиција. Пред референдумот имав закана дека ако излезам да гласам наскоро ќе се сретнам со мојот татко, кој е покоен, нагласи тој.

Заканите преку социјалните мрежи смета дека се од ботови, но за оние преку СМС пораки кажа дека ги пријавил телефонските броеви и се надева дека ќе бидат откриени.

Тој истакна дека за ова разговарал со раководството на партијата.

– Со Мицкоски разговарав и пред пет минути и пред еден месец. Тој ме уверува дека тоа не е од негова страна и од страната на ВМРО-ДПМНЕ. Јас би сакал да верувам во тоа, да живеам нормално, како нормален човек, да фуккцонирам нормално со моето семејство-, рече градоначалникот на Кавадарци.

На денот кога бил разрешен, истакна дека Мицкоски лично му се јавил и му понудил дали сака сам да си поднесе оставка или да биде разрешен, на што тој одговорил дека нема намера да си замине од партиската функција.