Исмаил Дарлишта стана обвинител

Исмаил Дарлишта, доскорешен уставен судија и поранешен министер за правда е избран за обвинител во Јавното обвинителство на Македонија, на денешната седница на Советот на јавни обвинители.
За прв човек на Вишото јавно обинителство во Битола е именувана Мери Тромбева, а Билјана Стефчева е шеф на радовишкото Основно јавно обвинителство, додека Ханефи Амет од Вишото скопско обвинителство е избран за обвинител во Основно јавно обвинителство во Тетово.

На денешната седница на Советот избрани се и неколку в.д. шефови на обвинителства, кои ќе бидат вршители на должност во наредните еден до два месеца. Тоа, како што појасни претседателот на Советот на јавни обвинители Коле Штерјов, е едногласно договорено за да може новиот јавен обвинител Љубомир Јовевски да си формира сопствен тим.

За вршител на должност на Јавното обвинителство за гонење на организиран криминал е назначена Гордана Смаќоска, на Основното јавно обвинителство-Скопје е именуван Сашо Рајев, во ОЈО Куманово е избрана Теута Бедиу, во Гостивар Башким Исини, а прв човек на битолското Основно јавно обвинителство останува Антонио Јолевски.

Распишаните огласи за останатите места же бидат поништени и ќе се објават нови.