Иванов: Несериозно е да се решава за името по телефон


„Очаен обид за манипулација на јавноста и наведување на македонските граѓани во пресрет на евентуално референдумско изјаснување“. Вака претседателот Ѓорге Иванов ја оценува вчерашната изјава на претседателот на Владата Зоран Заев, во емисијата „Топ тема“, дека евентуалното отфрлање на договорот со Грција ќе ги загрози перспективите на Македонија за влез во ЕУ и НАТО и ќе ги зголеми внатрешните опасности.

– Стратешките определби на Македонија за членство во Европската Унија и во НАТО се јасно дефинирани и непроменети. Зачувувањето на уставното име и изнаоѓањето на решение кое нема да предизвика уставни промени во никој случај не е насочено против интеграцијата на Македонија во Европската унија и во НАТО. Склучувањето на меѓународен договор содржан во еден или повеќе поврзани меѓусебни документи треба да биде во согласност со Уставот на Македонија, а не да предвидува негова измена, се наведува во соопштението од кабинетот на Иванов.

Во врска со повикот на премиерот Заев за поддршка на евентуалниот договор од страна на сите политички чинители, претседателот Иванов уште еднаш укажува дека е потребен широк национален консензус за изнаоѓање решение кое нема да го наруши достоинството на македонскиот народ и граѓаните.

Иванов смета дека е несериозно и неодговорно прашањето за името, кое е исклучително важно за граѓаните на Македонија, и наметнати технички барања, да се решаваат телефонски и по пат на личен договор меѓу премиерите на двете држави, се вели во соопштението од кабинетот на шефот на државата