Иванов: Да се почитува суверената волја на граѓаните на референдумот

Претседателот Ѓорге Иванов ги прими денеска акредитивните писма на Војчех Јежи Тичињски, новоименуван амбасадор на Полска во Македонија. Иванов на церемонијата на предавање акредитиви, како што соопшти неговиот кабинет, истакнал дека македонско-полските односи ги карактеризира искрено пријателство, меѓусебна почит, континуиран политички дијалог и значајна динамика во соработката во повеќе области од взаемен интерес.
Иванов порачал дека за нашата земја е од особено значење поддршката и помошта од Полска за реализација на нашите зацртани стратешки цели, членство во НАТО и во Европската унија.
– Јас како претседател на Македонија немам апсолутно никаква дилема дека местото на Македонија е во ЕУ и во НАТО. Но, таму треба да влеземе со нашето човечко достоинство, без уцени, притисоци и двојни стандарди. Суверената волја на македонските граѓани на референдумот треба да се почитува. Затоа, и по референдумот се надевам дека процесот за зачленување на Македонија во НАТО и во ЕУ ќе продолжи, рекол Иванов.

Тој побарал поддршка од Полска за деблокирање на процесот за членство на Македонија во НАТО и во ЕУ без притоа да се крши правото на самоопределување.

– Искрено очекувам и се надевам дека Полска ќе ги има предвид нашите аргументи, нашите постигнувања и дека поддршката во реализацијата на нашите цели ќе продолжи и во наредниот, исклучително значаен период. Европската перспектива е најдобрата гаранција за просперитет и стабилност на Балканот, порачал македонскиот претседател.

Амбасадорот Тичињски истакнал дека неговата земја придава големо значење на унапредувањето на билатералните односи и на зацврстувањето на пријателските односи меѓу двата пријателски народи. Во таа насока Тичињски посочил дека на вредностите кои ги приближуваат двата народи и двете држави треба да им се додаде уште едно нешто, а тоа е компатибилноста на заедничките интереси како партнери во меѓународните односи.

– Како земја што одигра важна улога во соборувањето на комунистичкиот систем во нашиот дел на Европа, ние веруваме дека секоја држава ја заслужува нашата поддршка за своите амбиции да ја обликува својата судбина во согласност со волјата на нацијата и принципите на демократскиот свет, изјавил амбасадорот Тичињски.

Според него, прифаќањето на ваква политичка филозофија од страна на Полска, исто така, резултира од претпоставката дека слободната, демократска, развојна и добра соработка со Македонија претставува важна цел не само за Македонците, туку и за целокупниот Балкански регион и Европа како целина и дека Европа не може да биде стабилна доколку сите европски земји не останат стабилни.