Затвор наместо условни казни за првите осудени за „крвавиот четврток“


Затвор наместо условни казни за првите деветмина осудени за „крвавиот четврток“ кои минатата година признаа вина и беа осудени на условни казни. Вака одлучи Апелациониот суд по жалбите што ги поднесе обвинителството за нив.

Од Апелација потврдуваат дека условните казни се преиначени. Седум од деветмина обвинети се осудени на една година затворска казна, еден е осуден на осум месеци затвор, а највисока казна доби Димче Ристовски – Жабата кој е осуден на една година и шест месеци затвор.

Овие деветмина беа првите осудени за упадот во Собранието и се товареа за учество во толпа што ќе спречи службено лице во извршување службена должност.

Кога беа изречени пресудите за овие девет лица на чело на Обвинителството беше Марко Зврлевски, а пред неколку месеци обвинителството поведе дисциплинска постапка против тројца обвинители, Гордана Гешковска, Јован Цветановски и Златко Биковски бидејќи направиле пропуст во истрагата. За Зврлевски нема одговорност, бидејќи тој веќе не работи во Обвинителството и е на апанажа.