Заев-Рама: Македонија и Албанија очекуваат идната година да ги почнат преговорите за интеграција во ЕУ


Република Македонија и Република Албанија очекуваат наредната 2018 година да ги започнат преговорите за зачленување во Европската Унија, да го искористат моментот на позитивна клима во регионот за напредок во тој процес. Тоа беше главната порака што ја испратија премиерите Зоран Заев и Еди Рама од Подградец каде денеска се одржа првата заедничка седница на Владите на двете држави.

– Со перспективите што ги отвараме за унапредување на меѓусебната поврзаност и инфраструктурата, за олеснување на размената на стоки и услуги, како и за зајакнување на соработката во областа на безбедноста одиме уште еден чекор понапред во процесите кон подобра европска иднина, истакна претседателот на Владата на РМ Заев на заедничката прес-конференција.

Премиерот Заев нагласи дека владите на двете држави работат искрено, отчетно и транспарентно за подобрување на животот на граѓаните на двете земји и за безбедна просперитетна иднина во евроатлантското семејство, јави известувачот на МИА од Подградец.

– Европските и НАТО интеграции не се само политичка определба туку и економска потреба за граѓаните на нашите две држави… Денеска беа потпишани многу значајни договори, меморандуми, заокружена уште една соработка во полето на безбедноста, во областа на меѓународната соработка, културата, образованието и во полето на владината соработка преку заедничката Декларација што ја потпишавме, истакна македонскиот премиер.

Албанскиот премиер Рама рече дека оваа седница е потврда на издигнувањето на повисоко ниво на соработката меѓу двете држави, во интерес на двата народи.

– Постои целосна билатерална усогласеност во насока на создавање регионална зона со поефикасно поврзување меѓу двете држави… Проектите како далноводот меѓу двете земји, оној за железничко поврзување, за културна соработка влева оптимизам дека ќе придонесат за унапредување на протокот на луѓе и капитал, привлекување инвестиции, истакна Рама.

Што се однесува на активностите на македонската Влада за донесување на Законот за унапредување на употребата на јазиците во Република Македонија, албанскиот премиер Рама ја поздрави храброста на премиерот Заев во спроведувањето на, како што рече, „неговата предизборна агенда за иницирање на усвојување на Законот за употреба на јазиците во Собранието и за одржување на едно големо ветување“, со оценка дека тоа силно ќе ги зајакне темелите на современа Македонија.

Претседателите на владите на Македонија и на Албанија утре е предвидено да ги посетат Македонците кои живеат во Мала Преспа и Пустец.

– Се радувам што утре ќе ја посетиме и македонската заедница што живее во Општина Пустец, која можеби по број не е голема, но не е такво и нејзиното значење. Ние веруваме дека со односот кон нив ни се дава можност да ја покажеме нашата почит кон сите етнички заедници во Република Албанија, на тие луѓе и на сите други да им се даде можноста да се чувствуваат како слободни граѓани со еднакви права, рече Рама.

Меѓувладината седница одржана денеска во Поградец е прва работна средба од тој вид меѓу двете држави. Премиерот Заев најави дека таквата практика ќе продолжи и наредната година, со одржување заедничка владина седница во Охрид или Струга.