Докторите на Клинички ќе плаќаат паркинг 800 денари, а не 300 како досега


Вработените во Клиничкиот центар треба да плаќаат паркинг со иста цена како и сите граѓани на Скопје, смета градоначалникот Петре Шилегов. Со одлука на Советот на Градот месечните паркинг карти во иднина, наместо 300 ќе чинат 800 денари. На овој начин градските власти ќе се обидат да го решат хаосот на паркингот во Клинички, а од друга страна ќе обезбедат средства и за инвестиции во монтажни паркинзи. Цената за паркирање на возилата на граѓаните нема да се менува.

Советничката група на ВМРО-ДПМНЕ побара оваа точка да се тргне од дневниот ред, а цените за докторите да останат исти. Според советничката Светлана Колариќ, одлуката нема да придонесе за решавање на проблемите, туку на медицинските сестри и техничкиот персонал, кои добиле мало зголемување на платите, сега истите средства ќе им ги извлече од џеб. Советничката Драгана Велковска од Левица, пак, посочи дека наплатувањето паркинг на здравствени работници кои се грижат за нашето здравје е скандалозно.