(ВИДЕО) Шекеринска за Би-Би-Си: Македонија успева да се пробива напред

Со вистинска политика и со вистинско лидерство, можете земјата да ја направите посилна. Македонија доживеа продолжена политичка криза која траеше три години, но од неа излеговме посилни и покажавме дека со вистинска политика и лидерство Македонија повторно стана позитивен балкански пример за ЕУ и НАТО, истакна министерката за одбрана Радмила Шекеринска за Би-Би-Си.

Шекеринска гостуваше во една од централните информативни емисии на Би Би Си њуз, „Beyond 100 Days”.

Во најавата на интервјуто, новинарката од студиото во Вашингтон Кети Кеј, ја претстави Македонија како земја која бара место во ЕУ и НАТО, по, како што рече, 10-годишно националистичко владеење, а новата Влада избрана врз заложбите за антикорупција и економски реформи, сега се пробива напред.

Во студиото во Лондон, со министерката за одбрана разговараше и новинарот Кристијан Фрејзер, кој ја праша Шекеринска зошто Македонија сака да биде членка на ЕУ.

– Поминавме низ 90-тите години, поминавме низ тешкотиите на распаѓањето на Југославија и знаеме колку е важно да имаме стабилно владеење, пристојни демократски вредности и да припаѓаме на нешто што е подобро и поголемо. И овие беа клучните поенти што произлегоа од нашите граѓани, рече министерката.

На прашањето околу настаните на 27 април и сликите со насилство во земја која сака да биде членка на ЕУ кои го обиколија континентот, Шекеринска рече: Демократските и сериозни земји некогаш запаѓаат во неволја и сметам дека клучното прашање е како тоа да се превенира. Македонија доживеа продолжена политичка криза која траеше три години и токму отсуството на контролни механизми, недостатокот на борба против корупцијата и се разбира, големиот притисок врз медиумите, противниците, бизнисите, ја доведоа всушност земјата во ваква ситуација.

– Македонија е мала земја и успева брзо да си ја поврати својата сила. Од овие слики не поминаа повеќе од седум месеци, а зборуваме за земја која може да биде извор на надеж за многу земји, особено многу балкански земји, дополни министерката.

Нашата земја, истакна, е земја на различности, од етнички, религиозен и политички аспект и од оваа криза се кренавме како пообединета земја со поголема кохезија.

– И ова е тоа што го слушнав од моите колеги од Босна и Косово и од други места на Балканот, што е всушност знак на охрабрување, дека може да се преживее една ваква агонија, но со вистинска политика и со вистинско лидерство, можете земјата да ја направите посилна. Од таа причина, новата Влада навистина се фокусира на агендата на демократски промени. Сметам дека дојдовме до конкретни резултати, многу добри избори на кои ја добивме поддршката од голем дел од нашето население и сметам дека повторно сме позитивен балкански пример и за ЕУ и за НАТО, подвлече Радмила Шекеринска во интервјуто за Би-Би-Си.