Македонија понуди помош за справување со пожарите во Грција

Дирекцијата за заштита и спасување со ресурсите со кои распоалага е ставена во функција на помош на Република Грција и доколку биде побарана помош ќе отпочнеме процедура за испраќање помош, информира директорот на ДЗС Аднан Џаферовски.

– Владата на Република Македонија е во постојан контакт со грчките власти и понудена е помош уште од вчера. ДЗС е владино оперативно тело и со своите ресурси е подготвено да помогне. Очекуваме одговор од нивна страна. Доколку изразат потреба ќе отпочне процедурата за испраќање помош од наша страна, изјави Џаферовски за МИА.

Министерството за надворешни работи на Македонија соопшти дека досега немаат барања за помош од македонски граѓани за пожарите во Грција и им препорачува на државјаните на Република Македонија да избегнуваат патувања во регионите во областа на Атика во околината на Атина.

Во Грција во изминатите 24 часа, од 6 часот вчера, до 6 часот утрово, биле регистрирани 47 пожари. Бројката на потврдени жртви од пожарите е 49 лица, според портпаролката на грчката противпожарна служба, додека пак 156 лица се повредени, од кои 11 се во критичка состојба.