Иванов: Во 2018 да зачекориме по вистинскиот пат

Претседателот Ѓорге Иванов во 2018 година очекува Македонија да зачекори на вистинскиот пат – до поквалитетен живот, просперитет и благосостојба за сите граѓани. Како што вели во новогодишното обраќање, се надева и на праведно општество, втемелено на вистината, слободата и мирот.
– Дозволете да ви ја честитам Новата 2018 година и од се срце да ви упатам искрени желби за добро здравје, за повеќе радост, поголеми успеси и подобро утре. Изминатава година бевме соочени со многу предизвици и премрежија, а политичката атмосфера непријатно се одрази на целото општество и на секој од нас посебно. Искрено се надевам дека во годината што доаѓа ќе се посветиме на убавите и позитивни нешта, посака шефот на државата.
Тој изрази надеж и дека ќе смогнеме сила за да ги надминеме поделбите, да ги отфрлиме предрасудите, да се сплотиме околу државните интереси и да зачекориме на вистинскиот пат.
– Новата година да ја почнеме со позитивни мисли и силна верба и надеж дека можеме да ги исполниме нашите искрени желби. Во новата година, посакувам повеќе да ја сакаме нашата заедничка татковина Република Македонија и секој од нас да даде личен придонес за едно поубаво општество за нашите деца, родители, роднини, соседи и пријатели. Посакувам повеќе да се почитуваме, да шириме љубов за да имаме мир со себе си и со другите, истакна Иванов во новогодишната честитка.