ВМРО-ДПМНЕ ќе бара мислење од Венецијанската комисија за договорот со Грција

Координаторот на пратеничката група на ВМРО-ДПМНЕ Драган Данев денеска на прес-конференција го повтори ставот во врска со договорот за спорот со името, кој се очекува да биде ратификуван во Парламентот. Најави дека партијата ќе ги преземе сите правни и демократски средства, а како една од нив е барањето што ќе го достават до Венецијанската комисија од која ќе побараат утврдување на правната природа на договорот.

– Имаме изигрување на правото и правната држава со цел легализирање на ова капитулантско дело. Тоа мора да биде правно санкционирано, рече Данев.

Владата на Република Македонија и парламентарното мнозинство, прекршувајќи ги Уставот, Деловникот, законите и процедурите, според него, сакаат да протуркаат антидржавен и антиуставен договор кој е во спротивност со интересите на граѓаните на оваа земја. Ваквото однесување, како што рече Данев, претставува продолжување на самоволното однесување на власта, каде преседаните стануваат пракса, а кршењето на Уставот, Деловникот и законите секојдневие.

– Ова е трет пат, трет случај на грубо непочитување на процедурите. Прво со изборот на Талат Џафери за „таканаречен“ претседател на Собранието, потоа со законот за двојазичност и сега со договорот со Грција, рече Данев.

Ја повтори забелешката за разгледувањето на договорот на Комисијата за европски прашања наместо во Комисијата за надворешни работи, каде се разгледуваше договорот со Бугарија.

– За потпишувањето на ваквиот договор и неговото противуставно и противделовничко спроведување во Собранието на Република Македонија ќе има одговорност, рече Данев.

За сите натамошни одлуки, како што кажа, ќе се консултираат со партиските органи. Данев не кажа дали утре ќе присуствуваат на седницата за пратенички прашања, која според него е неделовнички закажана.