ОЈО ќе го истражува ревизискиот извештај на МЕПСО за 2016 година

Владата на вчерашната 62. седница донесе одлука ревизискиот извештај на МЕПСО за 2016 година да биде испратен до Основното јавно обвинителство со цел дополнителна проверка на два индикативни наоди и започнување евентуални постапки, изјави на денешната прес-конференција портпаролот на Владата Миле Бошњаковски.

– Првата се однесува за купување на имот. Во 2011 година МЕПСО добила понуда да откупи имот од 2.178 метри квадратни по цена од 3,7 милиони евра, што ја одбива. Две години подоцна истиот имот, друго правно лице го продава на МЕПСО по цена од 4,8 милиони евра, изјави Бошњаковски.

Втората информиација, посочи тој, се однесува од времето на двоење на Електростопанство на Македонија, кога дел од мрежата во сопственост на МЕПСО не бил впишан во катастар како дел од имотот на компанијата.

– Овие објекти ЕВН ги има издадено под закуп и има земено хипотекарен кредит. Во ревизорскиот извештај е наведено дека оваа ситуација мора да се расчисти, односно дека имотот е во сопственост на државата, изјави Бошњаковски.

Прашан за кое раководно лице во МЕПСО станува збор, Бошњаковски рече дека се работи за 2016 година, но точните имиња не ги знае.