Зеленски отиде во Купјанск за да го демантира Путин: Градот не е освоен
Украинската армија презеде клучни делови од градот и опкружи стотици руски војници во изненадувачка операција
Украинските сили ги вратија северните делови од градот Купјанск во источната Харковска област, објави украинската војска. Командантот Ихор Оболиенски изјави дека како дел од операцијата, неколку околни села се ослободени и дека неколку стотици руски војници се опколени.
„Денес можеме да кажеме дека Русите во градот се целосно отсечени. Тие долго време не разбираа што се случува, а сега знаат дека се опколени“, изјави Оболиенски за Украинска правда.
Според официјалните мапи на бојното поле објавени од Киев, најмалку три села северно и западно од Купјанск се повторно под украинска контрола. Москва минатиот месец тврдеше дека целосно го освоила градот.
Украинскиот претседател Володимир Зеленски го посети бојното поле во близина на Купјанск, каде што сними видео и им го честиташе Денот на копнените сили на Украина покрај полууништениот влезен знак на градот. Тој рече дека украинските војници во областа постигнуваат конкретни резултати, отфрлајќи ги руските тврдења за целосна контрола врз градот.
„Денес сум на бојното поле Купјанск со нашите војници кои постигнуваат резултати за Украина тука. Русите многу зборуваа за Купјанск, гледаме како изгледа“, рече Зеленски, заблагодарувајќи им се на сите единици што учествуваа во борбите.
Русија го освои Купјанск во првите недели од инвазијата во 2022 година, но украинската армија го врати градот подоцна истата година. Рускиот претседател Владимир Путин минатата недела повтори дека Купјанск е во рацете на Москва, а за време на посетата на Киргистан во четврток рече дека градот е „целосно во наши раце“.