Зеленски го предупреди Орбан да не му работи „зад грб“ и на украинска штета

Украинскиот претседател Володимир Зеленски остро ги осуди патувањата во рамките на  самонаречената „мировна мисија“ на Виктор Орбан во Москва и Пекинг, сугерирајќи им на другите европски лидери да му го свртат грбот.

Говорејќи на отворањето на самитот на Европската политичка заедница во палатата Бленхајм во јужна Англија, Зеленски ги предупреди останатите 46 европски лидери  дека рускиот претседател Владимир Путин „може да ви пријде“ во обид „да ве искушува или притисне, да ве уценува, така што еден од вас да ги предаде останатите“.

Украинскиот лидер не го именуваше својот унгарски колега за време на неговото 10-минутно обраќање, но неговите забелешки јасно ставија до знаење на кого мислеше.

„Ако некој во Европа се обиде да ги реши прашањата зад грб или дури и на сметка на некој друг, ако некој сака да патува во главниот град на војната, да разговара и можеби да вети нешто против нашите заеднички интереси или на сметка на Украина или други земји, тогаш зошто да сметаме на таков човек? ЕУ и НАТО, исто така, можат да ги решат сите нивни прашања без овој поединец“, рече Зеленски.

Самитот во Велика Британија доаѓа две недели откако Орбан, тогаш само неколку дена од неговото шестмесечно ротирачко претседавање со Советот на ЕУ, отпатува во Москва на разговори со Путин за војната во Украина. Тој потоа замина во Пекинг на слични разговори со претседателот Кси Џипинг.Патувањата, кои Орбан ги прогласи за „мировна мисија“, наидоа на силна осуда од другите лидери на ЕУ, од кои никој не се сретнал со Путин од април 2022 година поради неговата неиспровоцирана целосна инвазија на Украина.

Унгарската влада инсистираше на тоа дека патувањата се направени на чисто билатерална основа и дека Орбан не го претставува блокот, но неговата употреба на логото на унгарското претседателство со ЕУ остави одредена нејасност.

Европската комисија претходно оваа недела објави дека нејзините комесари ќе ги бојкотираат неформалните состаноци на Советот организирани од унгарското претседателство и наместо тоа ќе испратат високи државни службеници. Урсула фон дер Лајен, шефицата на Комисијата која во четвртокот обезбеди втор петгодишен мандат на чело на извршната власт на ЕУ, исто така го нападна Орбан во нејзиниот говор пред парламентот.

Ирскиот премиер Сајмон Харис, исто така, истакна пред новинарите дека Европскиот совет „е апсолутно обединет“ во својата поддршка за Украина.

„Мислам дека претседателот Зеленски денеска во своите воведни зборови  ги искажа можеби сопствените ставови во врска со тие прашања“, додаде тој. „Но, јас ги споделувам тие ставови. Мислам, моментално има војна на континентот Европа.Поважно од кога било Европа е да зборува со еден глас, во смисла на одбрана на демократијата, суверенитетот и територијалниот интегритет“, рече тој.