Заврши комисиската седница за реорганизација на Владата, вечерва пленарна седница

Собраниската Комисија за политички систем и односи меѓу заедниците вечерва ја заврши расправата за Предлог-законот за  реорганизација на органите на државната управа, по скратена постапка. Вечерва со почетокот од 22 часот беше закажана пленарна седница за усвојувањето на законот, за кој е потребно двотретинско мнозинство. Во овој момент не е јасно дали новата власт ги има потребните 80 гласови.

Во комисијата за законот дебатираа само пратениците од СДСМ, споре кои ова е погрешно решение, кое се носи по скратена постапка, без анализа и дебата и може да има лошо влијание.  

Пратеничката Јованка Тренечевска, зборуваше за Предлог-законот во делот на труд и социјална политика и поделбата на надлежностите потенцирајќи дека станува збор за шминка и дека ќе се руинира она што е направено во изминатите 30 години. Дополнително, посочи таа во законот стои дека ќе има фискални импликации но не се посочува колку ќе чини оваа реформа. Обвини дека ВМРО-ДПМНЕ веднаш постапува спротивно на изборната платформа.

Ја критикуваше реформата согласно која ресорот труд се припојува кон министерството за економија. Разделувањето на ресорите труд и социјална политика, смета Тренчевска, може да доведе до занемарување на работничките права за сметка на економијата. Тренчевска зборуваше и за новото министерство за спорт, посочувајќи дека освен во Луксембург, во ниту една друга европска земја нема посебно вакво министерство. 

„Кај нас затоа што Борко Ристевски сака да стане министер се прави вакво министерство“, рече Тренчевска. 

Славјанка Петровска, пратеничка од СДСМ, смета дека почетокот на ова парламентарно мнозинство е поразително посочувајќи на скратената постапка со која се носи овој Предлог-закон. Соња Мираковска од НСДП рече дека нема ограничувања на дискусијата на пратениците на собраниските комисии, но дека кога се носи закон по скратена постапка дебатата е ограничена на три дена. „Лошо решение е кога трудот го преместувате во економија“, рече пратеничката на НСДП. 

Претходно Фатмир Битиќи, вицепремиер и пратеник од СДСМ, зборуваше за Предлог-законот изнесувајќи низа критики, меѓу кои и дека тој се носи без соодветна анализа и дебата, како и без објаснување како тој ќе ги смени животите на граѓаните. Според него, се зголемува бројот на министерства и другите органи а со тоа администрацијата ќе стане поробусна и уште понеефикасна. Изборните резултати, според Битиќи, не се трајна гаранција за легалитет. Според него, има непочитување на Уставот во делот на ингеренциите на Министерството за надворешни работи.  

Претседателот на Комисијата Љупчо Пренџов го опомена Битиќи дека го надминал времето за зборување, по што реагираше Славјанка Петровска исто така од СДСМ и побара да се цитира член од новиот Деловник во однос на времетраењето на дискусиите на пратениците. Како заменик-координатор Битиќи побара половина час пауза. 

Процедурална забелешка имаше и координаторот на пратеничката група на ВМРО-ДПМНЕ Никола Мицевски, кој кажа дека ќе се работи се додека не се донесе Предлог-законот и да го исполнат она што граѓаните го побарале од нив.