Застрашувачки тврдења: Во таа земја нема кучиња скитници, луѓето ги изедоа оти немаат што да јадат

Поранешната американска амбасадорка во Хрватска, Натали Рајес, која е родена во Венецуела, ја анализираше ситуацијата во таа земја по американската операција и апсењето на Николас Мадуро, откривајќи ја фазата на сиромаштија во која се наоѓа Венецуела.

Кога ја прашаа дали е изненадена од американската интервенција, Рајес одговори негативно.

„Не бев ниту изненадена ниту шокирана. Мадуро мораше да си оди. Тој беше нелегитимен претседател. Ја уништи својата земја и својот народ“, рече таа, потсетувајќи дека речиси осум милиони Венецуелци ја напуштија земјата.

„Опозициската влада и народот, волјата на народот, сакаа тој да си замине. А што се однесува до Доналд Трамп, кога вели дека ќе направи нешто, тој го прави тоа. Рече дека ќе преговара за да го охрабри самиот да си замине или ќе дојде и ќе го отстрани. И видовме што се случи минатата недела“, рече Рајес.

Економски колапс и глад
Рајес, зборувајќи за состојбата во која се наоѓа Венецуела денес, рече дека милиони луѓе заминуваат затоа што не можат да врзат крај со крај.

„Нема повеќе кучиња скитници во Венецуела затоа што луѓето ги јаделе затоа што немале храна. Ова го покажува очајот на еден народ и е многу тажно да се биде сведок“, рече таа.

Таа, исто така, изјави дека пензијата изнесува 50 центи месечно, додека еден литар млеко чини пет долари. „Едноставно е невозможно да се преживее со тоа!“, рече таа, додавајќи дека просечната плата од околу 200 долари не е доволна за основни прехранбени производи како јајца или сирење, кои чинат до 10 долари.

Таа потсети дека поради ова, на изборите во 2024 година, луѓето гласале за кандидатот на опозицијата Едмунд Урути, кого САД и околу 60 други земји го признаа за претседател.

Рајес истакна дека легитимитетот мора да дојде од гласачите, како и дека мора да има трансфер на власта.

„Венецуелскиот Устав е многу јасен за ова: ако претседателот повеќе не е присутен и нема да се врати, а знаеме дека Мадуро нема да се врати, изборите мора да се одржат во рок од 30 дена. Тоа треба да биде дел од равенката“, објасни таа.

Таа предупреди на опасноста од задржување на постојниот систем.

„Не можеме да го отстраниме лидерот и да ја задржиме истата корумпирана структура што е дел од проблемот. Гласовите на опозицијата мора да бидат вклучени во преодната влада, на еден или друг начин. Изборите мора да се распишат, бидејќи тоа е единствениот пат напред.“

Запрашана за последиците од американскиот потег за меѓународното право, Рајес рече дека меѓународната заедница треба да ја оцени легалноста на интервенцијата, но таа нагласи дека на венецуелскиот народ му олеснило.

„Не познавам ниту еден Венецуелец кој жали за заминувањето на Мадуро, сите се радуваат што тој си заминал“, рече таа, но сепак призна дека нема меѓународен консензус или конгресна поддршка, „што е проблематично“.