Започна министерскиот состанок на ОБСЕ, Ковачевски порача дека „историјата ќе ни суди“
Ниту една земја, без разлика на големината и силата, во денешно време, на долг рок, не може да просперира во изолација, рече Ковачевски
Историјата ќе ни суди по нашите дела – порача премиерот Димитар Ковачевски на отворањето на министерскиот состанок на ОБСЕ кој собра делегации од над 60 земји, меѓу кои и Русија. И тој и шефот на дипломатијата Бујар Османи нагласија дека нашето претседателствување се случи во време на војна без преседан во Европа, нарекувајќи ја директно воена агресија интервенцијата на Русија во Украина.
Во говорот Ковачевски посочи дека визијата на ОБСЕ како платформа за кооперативна и сеопфатна безбедност беше сериозно тестирана во Украина. Воената агресија на Русија тој ја оцени како неоправдана и неправедна и нагласи дека секој изминат ден и сите загубени животи се сурова потврда дека воената агресија преставува акт на флагрантно кршење на Повелбата на ОН, на принципите на ОБСЕ и на вредностите на хуманоста.
„Народот на Украина заслужува мир и војната мора да запре. Постигнувањето праведен и одржлив мир станува императив“, рече Ковачевски.
Според него, оваа војна продолжува да ги поткопува и темелите на ОБСЕ.
„Затоа, како клучно безбедносно прашање на нашиот регион и пошироко, централен приоритет за нашето претседавање беше и останува да биде обезбедување суштинска поддршка за Украина и нејзиниот народ низ димензиите на ОБСЕ“, нагласи Ковачевски.
Тој повика за момент да ги ставиме настрана националните агенди, кои најдобро можат да се реализираат преку мирољубива соработка во еден мултилатерален систем базиран на правила и почит на основните вредности и принципи.
„Ниту една земја, без разлика на големината и силата, во денешно време, на долг рок, не може да просперира во изолација, ниту пак сама да се справува со комплексните предизвици на 21. век“, порача премиерот. Тој додаде дека постои желба кај нас да возвратиме на Организацијата, која со својата теренска мисија од 1992 година до денес, дава свој придонес во напредокот на нашето вибрантно, инклузивно и разнолико, демократско општество.
Пред министерскиот состанок Ковачевски ја отфрли можноста да има билатерална средба со рускиот шеф на дипломатијата Сергеј Лавров.
„Нема да имам средба со Лавров“, одговори Ковчевски на директното прашање.
Ковачевски изрази надеж дека состанокот ќе биде успешен и дека ќе се донесат сите потребни одлуки кои веќе се договорени на ниво на амбасадори. Според него, секоја земја на свој начин испраќа порака за неоправданата агресија врз Украина – некои со неприсуство, други со јасно искажани ставови .
„Истото ќе го направам и јас“, најави Ковачевски. Според него, ова не е дипломатска победа на Русија, туку на ОБСЕ, бидејќи вака ќе продолжи да функционира и да биде гарант за развој на демократските и мировни процеси во Европа.
„Ако ОБСЕ пред 30 години ни помогна нам, денес Северна Македонија му помага на ОБСЕ да продолжи да биде најголема незбедносна организација на Европа“, порача Ковачевски.
Lavrov arrived at the meeting of OSCE Foreign Ministers in Skopje pic.twitter.com/iHwTYDjiFp
— 🇷🇺🇷🇺uncensored 未经审查 🇨🇳🇨🇳 (@M01Uncensored) November 30, 2023
Рускиот шеф на дипломатијата Сергеј Лавров меѓу последните пристигна во центарот „Борис Трајковски“, каде што се одржува министерскиот состанок на ОБСЕ. Тој ќе биде прилично осамен на масата, бидејќи на министерскиот состанок нема да бидат американскиот државен секретар Ентони Блинкен, шефот на европската дипломатија Жозеп Борел и британскиот шеф на дипломатијата Дејвид Камерон кој по вечерата и средбата со османи синоќа, исто така, си замина од Скопје. Се навестуваше дека по првиот дел од министерскиот состанок ќе си замине и австрискиот шеф на дипломатијата Александер Шаленберг, а од Полска стигна информацијата дека и нивниот министер за надворешни работи не доаѓа во Скопје заради поканата до Лавров. Франција ја преставуваше министерката за Европа Лоренс Бун, а од Германија дојде шефицата на дипломатијата Аналена Бербок.
Иако наголемо се шпекулираше за средба меѓу Блинкен и рускиот шеф на дипломатијата Сергеј Лавров, реално немаше теоретски шанси за тоа и тие се разминаа целосно, а многу веројатно и дтруги функционери заминаа бидејќи не сакаа да се најдат на иста фотографија со руската делегација и да пуштат сигнал дека се топат односите со Москва.
Од француската дипломатија порачаа дека присуството на шефот на руската дипломатија не укажува дека односот на Западот кон Москва е променет и дека Западот се откажува од обидите да ја изолира Москва затоа што значителен дел од членките на ОБСЕ ги осудуваат руските акции во Украина. Австрискиот шеф на дипломатијата Шаленберг на влегување пред состанокот изјави дека „ќе ни треба повеќе а не помалку ОБСЕ“ и дека во актуелната состојба потребна е ваква платформа за дијалог.
На министерскиот состанок се разговара за иднината на организацијата и за предизвиците со кои се соочува, а се очекуваат одлуки за изборот на претседавач за 2024 година, за што на подготвителниот состанок на амбасадори на 57-те земји членки неделава во Виена е постигнат консензус тоа да биде Малта. Треба да се одлучува и за буџетот, како и за именувања за клучните позиции во институциите на ОБСЕ. Предвидени се и два пропратни настани: потпишување на заедничката изјава за борба против корупцијата во Југоисточна Европа преку враќање на имотот и користење на дигитализација по кој ќе следи и адресирање на влијанието на климатските промени врз човековата безбедност во областа на ОБСЕ.
