„Во стапицата Бахмут“: Како руските сили беа намамени со месеци да крварат во ужасната битка

Украинската војска изминатите денови известуваше за ослободување на дел од териториите кај Бахмут. Иако независните набљудувачи сè уште не можат да потврдат до кој степен овие тврдења се вистинити, напредувањето дури и неколку километри за неколку дена е огромно достигнување, имајќи предвид дека руските трупи ги освојуваа овие километри со недели, па дури и месеци.

Успесите, иако мали, во деветмесечната битка го зајакнуваат моралот кај украинската војска, особено ако се има предвид фактот дека тие беа постигнати со редовни единици, уморни од битка, а не од оние специјално обучени за целосна контраофанзива.

Во неделата и понеделникот, одбранбените сили напредуваа на некои места на крилата околу Бахмут на растојание од 350 метри до 2 километри, изјави претседателот на Источната група на вооружените сили на Украина, Серхиј Черевати во етерот на телетонот. На север и на југ, во предградието на Бахмут, повторно се заземени околу 20 квадратни километри, напиша во средата заменик-министерката за одбрана Ана Малјар на Телеграм. Командантот на баталјонот за воздушни напади Аидар, мајор Александар Панцирни, потврди дека украинските сили „ја презеле иницијативата на крилата, северно и јужно од градот“, забележува „Њујорк тајмс“.

Шефот на „Вагнер“, Евгениј Пригожин, исто така, извести за успесите на украинските трупи минатата недела: „Крилата се распаѓаат, фронтот пропаѓа“. Во исто време, и Черевати и Малјар забележуваат дека руските трупи постепено напредуваат во самиот Бахмут, продолжувајќи да го уништуваат со артилериски оган.

Украинските власти постојано изјавуваа дека за да се започне целосна операција наменета за ослободување на окупираните територии, потребно е дополнително офанзивно оружје од сојузниците – тенкови, оклопни возила, проектили, како и муниција. Оружјето доаѓа во серии, а контраофанзивата ќе започне кога вооружените сили на Украина ќе го имаат потребниот минимум оружје, рече Володимир Зеленски минатата недела.

Но, успехот во Бахмут беше постигнат без употреба на големи западни оружја, како што се борбените возила на пешадијата „Бредли“ или тенковите „Леопард“, вели Конрад Музика, воен аналитичар во полскиот Рочан консалтинг. Исто така, не беа искористени единиците кои добија специјална обука за учество во контраофанзивата, вели Черевати.

На почетокот на април беше објавено дека за тоа биле формирани осум единици со вкупно 40.000 луѓе.

Дополнително, изјави Музика за „Њујорк тајмс“ украинските контранапади кај Бахмут уште еднаш ги открија „фундаменталните проблеми на руската армија – недостатокот на интеракција помеѓу редовните единици и единиците на ‘Вагнер’, лошата комуникација и слабиот морал“.

Руските трупи го засилија артилериското гранатирање на Бахмут во последните денови, очигледно за да го пробијат центарот на градот по губењето на периферијата, изјави за „Волстрит џорнал“ полковник Роман Гиршченко од 127. бригада за територијална одбрана. Дел од успехот во предградијата, рече тој, е тоа што неговата бригада и другите единици држат големи руски сили во центарот на Бахмут: „Го принудивме непријателот да ги собере своите резерви против нас“.

Според САД, само помеѓу декември и април, Русија изгубила повеќе од 100.000 луѓе во операцијата Бахмут, вклучувајќи повеќе од 20.000 кои загинале за време на борбите; Џон Кирби, координатор за стратешки комуникации во Советот за национална безбедност на Белата куќа, го објави ова на почетокот на мај. Во исто време, на секој убиен украински војник има најмалку пет руски, напиша Си-Ен-Ен во март, повикувајќи се на разузнавањето на НАТО.

Многу западни аналитичари, па дури и украински војници, се прашуваа зошто е потребно да се задржи Бахмут по таква цена, кој не беше од големо стратешко значење. Но, Филипс О’Брајан, професор по стратешки студии на Универзитетот Св. Ендрјус во Шкотска (тој беше еден од ретките на Западот кој, уште пред војната, веруваше дека Русија ќе заглави во Украина), смета дека ова е разумно решение:

Со тоа што ја принуди руската команда да повлече огромни резерви кај Бахмут, Украина не само што ја ослабна непријателската армија, туку и ја спречи да се подготви да одбие напад и да изгради одбранбени структури во други региони, вели О’Брајан: „Последното нешто што ѝ требаше на Украина беше Русија да премине во одбраната“.

Успесите од последните денови во близина на Бахмут го подигнаа моралот во украинските единици, изјави за „Волстрит џорнал“ воен лекар од 93. механизирана бригада, кога пред само една недела неговите колеги се сомневаа во потребата да се брани градот. „Имам надеж“, призна тој.

Потоа се изрази поодлучно:

„Го намамивме непријателот во стапицата Бахмут. Тој загуби неверојатно количество на работна сила. И ние продолжуваме да го пуштаме непријателот да крвари“.

Една од главните задачи на украинската армија за време на контраофанзивата треба да биде ослободување на територии на југот на земјата со цел да се пресече „копнениот мост“ од Крим, преку кој се снабдуваат руските војници, велат воените експерти. Но, Украина веројатно нема да започне фронтален напад онаму каде што најмногу се очекува. Минатата есен, измамата на југот – Херсонската офанзива на која беше насочено целото внимание – дозволи ненадеен напад за ослободување на територии на североисток. Ако овој пат Украина, на пример, ја започне својата голема контраофанзива со ослободувањето на Бахмут, тоа нема да биде само воен пораз за руските сили, туку и колосален психолошки удар.

Во руските единици се делат летоци со предупредување за напад на Украина, пишува „Волстрит џорнал“, повикувајќи се на фотографии споделени од украинската војска. Офанзивата ќе биде ненадејна и „со 100% веројатност – ноќе“, исто како што нападнаа „нацистите во 1941 година“, велат тие.

Наредникот Роман Трохимет од 3. одделна јуришна бригада, која ги нападна руските позиции кај Бахмут, за ВСЈ изјави дека и покрај загубите, расположението во неговата единица е „многу добро“: „Многу месеци имаше одбрана, одбрана, одбрана. Беше многу тешко. Конечно повеќе не сме во дефанзива и можете да ги видите резултатите“.