Во петок се уриваат дивоградбите на трговскиот во Кочани, ако газдите сами не ги турнат
По решение од градежен инспектор, вo петок 5 септември, во попладневните часови, Општина Кочани ќе започне со уривање на дивоградби што ја загрозуваат безбедноста во Трговскиот центар.
Доколку до тој период сопственикот на нелегалниот угостителски објект на терасата во Трговскиот центар сам не ја отстрани дивоградбата, уривањето ќе го изврши Општина Кочани преку економски оператор избран со јавна набавка, предупредува в.д. градоначалникот на Кочани Венко Крстевски.
– На 28 април одржавме состанок со угостителите од Кочани кои беа информирани дека Општината ќе се залага за хуманизација на просторот и дека безбедноста е првата причина поради која нема да се прават отстапки со узурпација на јавните површини. На 18 јуни оваа година поднесов кривична пријава за узурпација на јавна површина и бесправна градба против угостители што ја загрозуваат безбедноста на граѓаните бидејќи и по трагедијата во „Пулс“ има угостители што работат нерегуларно и незаконски. Со тоа покажуваат дека поважен им е личниот профит, отколку безбедноста и здравјето на граѓаните, на жителите во зградите каде што се лоцирани објектите, но и на самите посетители -вели Крстевски.
Јавната површина е јавен интерес и нема никаква толеранција кон угостителските објекти кои го узурпираат јавниот простор и создаваат безбедносен проблем, потсетува тој.